Бошкоски го обвинува Груевски дека воведува диктатура

Лидерот на Обединети за Македонија, Љубе Бошкоски, вчера ги обвини Владата и премиерот Никола Груевски дека во изминативе четири години работат на воведување диктатура во државата. Тој остро ја критикуваше власта дека со непочитување на одлуките на Уставниот суд, со закани и смени на судиите што не им одговараат, свесно и намерно заговараат анархија.

„Доколку власта не ги почитува одлуките на Уставниот суд, тогаш нема причина никој од граѓаните да ги почитува законите од Собранието“, рече Бошкоски.

Според него, реториката на власта ја користат и сите оние што се под нејзина контрола, посочувајќи го Судскиот совет, кој како што рече, одговара само пред премиерот Груевски и пред министерот Маневски.

„Се прашуваме дали ова исмејување и непочитување на судската власт од страна на Груевски е подготовка и вовед во непочитувањето на судските одлуки, кои за не многу долго време ќе ги носат судовите по однос на криминалот, кој ќе се покаже дека е главното обележје на оваа ненародна Влада предводена од фамилијата“, додаде Бошкоски.

Тој го предупреди Груевски да престане да си поигрува со судбината на граѓаните и да ја напушти власта, бидејќи, како што рече, ова е последна шанса за демократизација и функционирање на правната држава на патот кон запрените евроатлански процеси. (Г.Д.)