ИВЗ веќе не крие дека вахабитите ги заземаат џамиите

По тепачките и безредијата во Босна и во Косово предизвикани од вахабитите, дали сега мечката заигра и во нашиот двор?

Билјана Јовановска

Тупаниците и клоците, кои во скопската џамија „Иса-бег“ си ги разменија приврзаниците на Исламската верска заедница и припадниците на радикалниот ислам, најдиректно ја испровоцираа институцијата што е задолжена за религискиот живот на муслиманите. Првпат ИВЗ јавно проговори за вахабизмот во своите редови. Досега и таа и нејзиниот поглавар Сулејман Реџепи од петни жили го негираа присуството на брадосаните припадници на исламот, облечени во драп панталони до глуждови и фактот дека токму тие постапно им ја преземаат власта во џамиите. Овој пат, малку се подотворија и политичките партии кои се и тоа колку заинтересирани да имаат стопостотна контрола врз ИВЗ. Сега припадници на ДУИ го бранат нападнатиот имам Рамадан Рамадани, за кого, пак, скопскиот муфтија тврди дека и' припаѓа на „криминално-вахабистичка банда позната по своето радикално дејствување и малтретирање на муслиманските верници“. Ваквиот исказ на скопскиот муфтија, Ибрахим Шабани, треба да се земе со сета сериозност, бидејќи се' појасно станува дека и радикализмот и политиката се длабоко навлезени во ИВЗ. За потсетување, актуелниот поглавар Сулејман Реџепи беше избран со силна помош на ДПА, која и сега е заинтересирана како ќе се развиваат настаните.

Индикативно е зошто ИВЗ ако веќе знаела дека Рамадани е предводник на радикалниот ислам, молчешкум поминуваше преку неговите секојдневни активности за обновување на Бурмали-џами��ата на скопскиот плоштад. Точно е дека тие се оградија од здружението, ама не кажаа ниту збор дека токму тој е нивниот лут противник.

Вахабитите се тука крај нас и несфатливо е зошто некој упорно го премолчува тој факт. Свесно им оставаа простор да се намножат, да се организираат и да дејствуваат или бегање од вистината? Директниот судир меѓу верниците џамијата во „Иса-бег“ е можеби првиот поконкретен директен судир, но Заедницата одамна ги има испуштено и конците во најпознатите скопски џамии „Јахја-паша“ и „Султан Мурат“, ама и во „Хатунџик“, „Алаџа“, „Тутун Суз“... Во западниот дел од државата нема град во кој бројот на вахабитите постапно не се зголемува, и покрај поддршката што му ја дава власта на муфтиството. Таков е случајот во Ресен, Гостивар, Кичево, Тетово, Струга, Охрид како и во сите села што гравитираат во тој регион.

Неофицијално, во Министерството за внатрешни работи сериозно ги имаат на око раздвижувањата и активностите на припадниците на радикалниот ислам, иако се тврди дека станува збор за поединци. Нашата држава со години разменува информации со странски служби за растечкото присуство на радикалните исламисти, кои за својата активност добиваат големи пари од Саудиска Арабија, ама и од други земји, кои не штедат пари за финансирање на фундаменталистите. Во лондонски „Сандеј тајмс“ пред три месеци беше изнесен податок дека на Балканот, вклучително и во Македонија, влегуваат стотици милиони фунти, кои, во форма на хуманитарна помош или на рака, им се даваат на балканските муслимани за да го зголемат отпорот кон надворешната политика на Западот кон исламските земји, но и за наоѓање регрути-исламисти за испраќање во војната во Авганистан. Неделникот тогаш предупреди дека, наводно, македонските власти им покажале доверливи документи дека го надгледуваат и работењето и однесувањето на неколку муслимански хуманитарни и доброволни организации, објаснувајќи оти некои од нив се од Саудиска Арабија.

Пред неколку години за омасовувањето на вахабиите во Скопје предупреди актуелниот директор на Европскиот центар за стратегија, разузнување и безбедност од Брисел, Клод Монике. Тој многу директно кажа дека во одредени џамии во главниот град постојат и пасивни ќелии на Ал Каеда, а европскиот експерт во тој контекст ја спомнаа и „Визбег“ џамијата во Шуто Оризари.

Вахабиите немаат проблем со изворите на финансирање на своите приврзаници и тука работата ја тераат на најдобар можен начин. Додека ИВЗ проблемот го турка под тепих, вахабистите или селефистите, со години регрутираат свои приврзаници. Целна група главно им се посиромашните семејства кои, едноставно, ги поткупуваат со 20 или повеќе евра месечно, а за возврат тие мора да присуствуваат на нивните молитви.

Исламските теолози кои ја поддржуваат ИВЗ за себе велат дека се припадници и следбеници на изворниот ислам кој традиционално се практикува кај нас. Потенцираат дека освен по надворешните обележја, никој јавно не прифаќа дека е вахабија или селефист. Ги разликува различната интерпретација на исламот и главно, на теолошка основа се обидуваат да го негираат кредибилитетот на ИВЗ за која сметаат дека е корумпирана.

Дали тепачката во „Иса бег“ џамијата е само навестување по сличните настапи во Босна и на Косово, мечката заиграла и во нашиот двор, одговорот го има МВР кое се уште игра на картата на минимизирање на проблемот.