Отпуштањата никако не запираат

Не престануваат отпуштањата во македонската индустрија. Всушност, намалување на бројот на работниците во индустрискиот сектор беше регистрирано во речиси сите изминати месеци, и покрај тоа што во одреден период имаше раст на индустриското производство.

Најновите податоци на Државниот завод за статистика говорат дека бројот на работници во индустријата во август годинава во однос на истиот месец лани е намален за 1,9 проценти.

Уште позагрижувачки е податокот што во првите осум месеци од годинава, во однос на периодот јануари - август 2009 година, бројот на работниците во индустријата се намалил за 5,9 отсто.

Според податоците од Државниот завод за статистика, бројот на работниците во секторот вадење руди и камен е намален за 0,4 отсто, во преработувачката индустрија е намален за 2,1 отсто и во секторот снабдување со електрична енергија, гас и вода е намален за еден отсто.

И ако отпуштањата во август толку и не изненадуваат, бидејќи се случуваат во месец со пад на индустриското производство, не е јасно зошто намалувањето на бројот на работниците не запре ниту во јуни ниту во јули, кога имаше позитивни резултати, односно зголемување на индексите во индустријата. Синдикатите тогаш предупредија дека газдите на индустриските компании го зголемиле обемот на работа, но не сакаат да ги вратат претходно отпуштените работници, туку работата да ја завршат со постојните, најчесто преку нивна прекувремена работа. (Ек.Р.)