Крај на камионџискиот хорор во Грција

По 19 дена штрајк на сопствениците на камиони, следната недела, конечно, ќе се стабилизира грчкиот пазар

Од нашиот дописник
Миркица Поповиќ

Атина - По 19 дена блокади на патиштата, празни рафтови во супермаркетите и милиони евра загуба за грчката економија, сопствениците на камиони и цистерни вчера го прекинаа штрајкот. Одлуката беше донесена во два часот наутро во петокот во Синдикатот на камионџиите, но не може да се каже дека беше прифатена лесно од штрајкувачите, кои три недели протестираа и пред Владата, и на клучните делови на автопатите, влезовите во Атина и во Солун, како и на пристаништата, со цел да биде спречен истоварот и товарот на производи и на храна за увоз и за извоз од државата.

Одлуката за прекинување на штрајкот пред зградата на синдикатот беше проследена со инциденти од страна на група штрајкувачи, кои сметаат дека штрајкот треба да се продолжи. Оваа група сопственици истакнаа дека се чувствуваат предадени од страна на синдикатот и вчера расправаа за тоа дали самостојно ќе продолжат да протестираат или не.

Изненадувачки беше тоа што по завршувањето на седницата на синдикатот и објавувањето на одлуката за прекин на штрајкот, претседателот на синдикатот, Јоргос Ѕорѕатос, насмевнат и задоволен, изјави за медиумите дека имаат добра соработка со Министерството за развој и поради тоа се става крај на штрајкот. Што крие насмевката на Ѕорѕатос, кој од самиот почеток на штрајкот во јули истакнуваше дека Владата нема разбирање за сопствениците на камиони, останува да се види, бидејќи никој од синдикалниот одбор не даде официјално објаснување од кои причини се прекинува штрајкот.

Се оценува дека прекинувањето е делумно поради владините мерки за високи парични казни за оние што ќе го продолжат штрајкот да ја попречуваат работата на државните цистерни и камиони. Друга причина за која се шпекулира е дека Министерството за развој направило некаков договор за помош на камионџиите и полесно приспособување на новиот закон за отворање на професиите, со кој ќе се намали цената за дозволи. Не се исклучува ни можноста една од причините да е и гневот на трговците, кои особено оваа недела се свртеа против штрајкувачите. Иако во почетокот народот ги поддржуваше штрајкувачите, сепак, по 19 дена и секојдневни милионски загуби и принудни одмори за работниците мораше да се најде форма за работите да се вратат во нормала. Најмногу на удар беа грчките извозници. Со големи загуби, но и принудни одмори за вработените се соочија голем број супермаркети, слаткарници, бутици чии рафтови се испразнија поради немањето производи. Според трговците, ќе бидат потребни околу 10 дена за да се пренесат производите од пристаништата и да се распоредат во маркетите за да може да се стабилизира состојбата на пазарот.