Загубарите повторно не се продадоа, a сега?

Тоа беше петтиот обид на Владата да го реши статусот на прилепските Тутунски комбинат и „Еурокомпозит“ и на охридски ЕМО

Маја Томиќ

Нема компании што сакаат да ги купат македонските загубари. Во четвртокот заврши рокот од петтиот тендер, а иако неколку компании ја подигнале тендерската документација, ниту една не доставила понуда во Министерството за економија.

Што сега п овој петти пропаднат обид за нивна продажба? Што ги одврати инвеститорите и овој пат? Дали Владата има нов џокер за да се спаси од товарот на загубарите? Во Министерството за економија велат дека допрва ќе се одлучува што и како натаму. „Се' што донесе Владата како одлука, ние ќе го спроведеме“, велат од Економија.

Инаку, ЕМО брои 1.835 вработени и има обврски од близу 40 милиони евра, „Тутунски комбинат“ е со 1.166 вработени и долгови од над 60 милиони евра, а „Еурокомпозит“ има 454 вработени и должи близу 2 милиона евра.

И за ОХИС, за кој се објави посебен тендер на 17 септември и ќе трае до 2 ноември, ова е петти обид за продажба. Компанијата за само шест месеци од оваа година направи загуба од еден милион евра, додека ланската загуба изнесуваше 6,37 милиони евра. Обврските, пак, на ОХИС се проценуваат на 16,9 милиони евра. Главната причина зошто компанијата не отиде на тендер заедно со другите загубари беше државната сопственост на градежното земјиште во кругот на фабриката. Со новата владина мерка за откуп на земјиштето за едно евро за квадрат, би требало да се олесни тендерската постапка.

Инаку, овој последен тендер за загубарите го распиша Владата на крајот на мај и требаше да трае до 30 јули. Но, беше пролонгиран до 30 септември. Од Економија тогаш изјавуваа дека имало заинтересирани странски компании, но не ги обелоденуваа нивните имиња. И уште нагласуваа дека пролонгирањето на терминот не е поради некакви забелешки од страна на компаниите, туку дека е на барање на самите фирми поради кусиот тендерски тајминг и времето на годишните одмори.

Владата имаше надеж дека ќе се јави некоја сериозна компанија, затоа што, како што изјави летото вицепремиерот Владимир Пешевски, биле спуштени критериумите за цената, а фирмите се нудеа исчистени од долгови.

Моделот и критериумите за продажба на загубарите, како што е познато, беа изработени од консултантите „Дилоит и Туш“ и „Бул брокерс“, за што лани од државната каса беа искеширани 700 илјади евра. Целата постапка, од тендерот до конечната продажба, Владата планираше да биде завршена во рок од 12 месеци. Планот на Владата падна во вода.