„Текнохозе“ е новиот сосед во „Бунарџик“

Маја Томиќ

Американската „Џонсон контролс“ и британската „Џонсон Мети“ во зоната „Бунарџик“ ќе добијат сосед, италијанската „Текнохозе“. Директорот на Технолошко-индустриски развојни зони, Марјан Јованов и Антонио Витило, сопственикот на групацијата „Витило“, чиј дел е „Текнохозе“ , вчера го потпишаа договорот за закуп на земјиштето, во зоната Скопје 1 „Бунарџик“, со што се означи стартот на оваа инвестиција.

Владата и' дава на фирмата 10 хектари земјиште по цена од 10 евроценти по квадратен метар годишно, на период од 50 години, плус дополнителни 45 години. Исто така, се предвидува и ослободување од данокот на добивка и од персоналниот данок, во период од 10 години, како и ослободување од ДДВ и од царини за опрема и за суровини. За „Текнохозе“ ова е прва странска инвестиција, вредна10 милиони евра за првите пет години. Со неа треба да се вработат 150 лица што ќе се обучуваат во Италија. Ќе се произведуваат делови за автомобилската индустрија, хидраулични спојници под висок притисок и армирани гумени црева за поширока употреба. Производите ќе се пласираат во странство, пред се', во земјите од ЈИЕ и во Русија, за чиј пазар „Текнохозе“ работи подолго време. Производството треба да почне наредната година, а за почеток ќе се одвива во објектот што компанијата веќе го поседува од 2008 година и кој е купен на јавен оглас од Министерството за финансии. Во наредните три години се најавува дека ќе биде изграден уште еден производствен погон.

Која беше причината што оваа компанија досега не ја почна инвестицијата во Македонија?

„Иако објектот го купивме во 2008 година, сепак, инвестиција не почна порано поради економската криза. Моравме да забавиме со инвестициите, а во првите три месеци од годинава зголемената продажба и резултати во работењето ни го овозможија продолжувањето на ваквите зафати. Потврда за тоа е потпишувањето на вчерашниот договор“, рече Витило, на вчерашниот италијанско-македонски бизнис-форум, на кој присуствуваа 30 италијански и над 90 македонски компании од повеќе сектори.

Според Адолфо Урсо, заменик-министер за економски развој на Италија, економските реформи во Македонија во последните години одат во вистински правец, за што потврда е присуството на стотина италијански бизнисмени.

„Веруваме во Македонија, која повеќе години е наш стопански партнер. Иако е мала земја, сакаме да дадеме придонес во нејзиниот развој преку инвестиции во повеќе инфраструктурни проекти што се планираат. Имаме стратегиски интерес да вложуваме тука, со што се отвора нова важна фаза во нашето работење. Македонија сака во ЕУ, а Италија ќе го поддржи нејзиниот напор и ќе помогне во тој процес на вклучување“, изјави Урсо.

Министерот за економија Фатмир Бесими посочи дека Италија се наоѓа на 13. место на листата на инвеститори во земјава, а во периодот од 1997 до 2009 година се вложени околу 70 милиони евра. „Италија е наш најголем трговски партнер, а со овој форум се создава основа за зајакнување на бизнис-соработката. Досегашната политичка и економска соработка сега е крунисана со потпишувањето на договорот со ’Текнохозе‘. Има и интерес за поддршка на доизградбата на коридорите 8 и 10, како и за други проекти што ќе произлезат“, истакна Бесими.

Италијанската групација „Витило“ е во приватна сопственост и вклучува две фирми, „Групо Витило“ и „Текнохозе СРЛ“. Поседува шест фабрики во јужна Италија и вработува околу 200 лица. Околу 50 отсто од производството се пласира во странство, а годишниот обрт на компанијата изнесува 36 милиони евра.

Италијанецот Витило вчера падна од бината

Претставникот на италијанската групација „Витило“, Антонио Витило, во еден момент вчера го снема од бината. Тоа се случи при потпишувањето на декларација за зајакнување на регионалната соработка во значајни области, на италијанско-македонскиот бизнис-форум во хоте��от „Александар палас“.

„Првиот италијански инвеститор, кој реши да гради фабрика во ’Бунарџик‘, вредна десет милиони евра, доживеа незгода. Тој падна од бината при потпишувањето на договорот“, пренесуваат агенциите. „Витило се повлече чекор назад, веројатно да направи повеќе простор за другите присутни лица, но се лизна од работ на бината, висока околу еден метар. За среќа, бизнисменот од Италија мина без повреди. Веднаш се крена на нозе и со насмевка на лицето се врати назад на бината“, пишуваат агенциите. (Ек.Р.)