Малолетник нападнал полицаец со нож

Петнаесетгодишник кој полицијата го барала по потерница нападнал полицаец и со нож му ја расекол дланката. Инцидентот се случи во Штип кога полицијата го пронашла момчето кое пред десетина дена побегнало од Воспитно-поправниот дом за малолетници, лоциран кај затворот во Шутка.

Кога полицијата го пронашла во градот, малолетникот ги замолил да појде до неговиот дом за да земе со себе неколку лични предмети. „На полицајците им рекол дека има оставено торба со алишта под кревет, која треба да ја земе и тие му ја ослободиле едната рака. Но, момчето тогаш извадило нож и го расекло едниот полицаец по дланката“, вели портпаролката на СВР - Штип Снежана Санева. Малолетникот бил совладан од полицијата и вратен во ВП-домот во Скопје. Според полицијата, станува збор за момче со дебело криминално досие со тешки кражби и разбојништва. Тој во ВП-домот се наоѓал од минатата година, а треба да издржува воспитна мерка во траење до пет години. Според информации од ВП-домот, од оваа институција годинава се регистрирани педесетина бегства на малолетници, од кои дел се вратени назад. Моментално десетина малолетници се во бегство. (Х.Р.)