Загина работник по пад од скеле

ВЕЛЕС - Градежен работник загина по пад од скеле, при изградба на куќа во населбата Речани кај Велес. Несреќата се случи завчера додека Стојко Тодоровски работел на изградба на станбениот објект. Во еден момент паднал од скелето високо шест метри и се здобил со тешки повреди. Неговите колеги веднаш повикале Брза помош по што повредениот градежен работник бил пренесен на Хируршкото одделение во велешката болница.

,,Има скршеници на главата, на коските на черепот и бутната коска. Пациентот беше во коматозна состојба, го реанимиравме и во придружба со доктор веднаш го пративме за Скопје, бидејќи сериозно му беше загрозен животот“, вели примариус д-р Филип Тодоровски, специјалист по трауматологија. Од Ургентниот центар во Скопје велат дека пациентот бил донесен во многу тешка состојба. Се обиделе да му помогнат, но тој по два часа им подлегнал на повредите. (С.Н.Ќ.)