Во Тирана се кријат 500 криминалци

Периферијата на Тирана со години претставува засолниште на лица по кои трага полицијата. Околу 500 лица, кои полицијата ги бара за тешки кривични дела, пред се', за разбојништва и убиства, се кријат токму на периферијата на албанската метропола, пишува весникот „Шекули“. Според истиот извор, голем дел од нив се од северниот дел на земјата.

Криминалците, според полицијата, не се враќаат во местото на живеење, бидејќи многу полесно ќе бидат препознати. Во Тирана може многу полесно да се движат, а дел од нив се и вработени.

Полицијата не крие дека дел од оние што ги бара веќе се пребегани во други земји. Главно, станува збор за жители од јужниот дел на земјата, кои засолниште нашле во Грција или во Италија. Криминалците кои илегално влегуваат на грчка територија веќе го имаат сменето идентитетот. Со нов идентитет се и оние во Италија. Дел од криминалците од северниот дел на Албанија се кријат во Косово. (МИА)