Вацлав Хавел добитник на наградата „Франц Кафка“

Драмскиот автор, писател и поранешен чешки претседател на Чешка, Вацлав Хавел, е лауреат на Меѓународна книжевна награда „Франц Кафка“, која годинава се доделува по јубилеен десетти пат.

Наградата, која се доделува на автор чии дела и исклучителен квалитет се наменети за читатели, без оглед на нивното потекло, националност и култура - соодветно на творештвото на Кафка, кој е еден од најзначајните писатели на 20 век, завчеравечер Хавел ја прими во чешката престолнина.

„Од различни причини јас неверојатно го почитувам Франц Кафка. Го читав во младоста кога не беше толку познат и популарен и секако дека ми е задоволство што добив награда која го носи неговото име“, рече Хавел по повод доделувањето. Тој додаде дека не се чувствува како негов ученик, туку како човек кој посебно ги разбира и има специфична чувствителност за некои основни теми на Кафка.

Бронзената статуа, која е всушност намалена верзија на споменикот на Кафка, што се наоѓа во Стариот град на Прага, прв ја доби американскиот писател Филип Рот, по него австриската драмска авторка и писателка Елфриеде Јелинек, како и јапонскиот писател Харуки Мураками и чешкиот автор Арношт Лустиг.

Минатата година наградата отиде во рацете на контроверзниот книжевник од австриско потекло Петер Хандке. (Н.П.)