„Пред дождот“ на Манчевски во Украина и во Тајван

Македонскиот филм „Пред дождот“ на режисерот Милчо Манчевски вчера беше прикажан на Меѓународниот филмски фестивал „Молодист“ во Киев.

Како што соопштува „Банана филм“, по повод 40 години од постоењето на Меѓународниот филмски фестивал „Молодист“, „Пред дождот“ ќе биде прикажан во изборот од најдобри филмови прикажани во четириесетте претходни фестивалски изданија. На проекцијата во Киев се очекуваше да присуствува и Милчо Манчевски.

Филмот ќе биде прикажан и во Тајван на покана од „Клубот на мислители“ од Универзитетот во Хсинчу. Клубот организира месечни семинари на кои се охрабруваат дијалогот, дебатата и размената на идеи меѓу студентите. Секој семинар почнува со внимателно избран филм од светското кинематографско наследство, за кој раководството смета дека ќе има силно влијание врз темата за дискусија. Првиот семинар на Универзитетот оваа година ќе биде на тема „Глобални п��рспективи на етничкиот конфликт“, а ќе биде отворен со филмот на Манчевски.

„Пред дождот“ е добитник на „Златен лав“ на Филмскиот фестивал во Венеција, номиниран е за „Оскар“ и е добитник на уште 30 награди. „Њујорк тајмс“ го вброи меѓу 1.000 најдобри филмови на сите времиња. (К.Р.)