Дополнето издание на „Сестрата на Зигмунд Фројд“ од Смилевски

„Дијалог“ од Скопје деновиве го објави новото дополнето издание на романот „Сестрата на Зигмунд Фројд“ од Гоце Смилевски. За овој роман Гоце Смилевски ја доби Наградата за литература на Европската унија што ја доделува Европската комисија во соработка со Европската федерација на издавачи. Високото признание на авторот ќе му биде врачено на 18 ноември во Кралскиот фламански театар во Брисел.

Со фрагменти од романот „Сестрата на Зигмунд Фројд“ минатата година Гоце Смилевски беше застапен во антологијата „Најдобра европска проза“ меѓу 30 истакнати писатели од европските литератури.

Гоце Смилевски е добитник на повеќе книжевни признанија, меѓу кои: Наградата „Роман на годината“ на „Утрински весник“ за романот „Разговор со Спиноза“; Наградата на австрискиот и на македонскиот ПЕН-центар за драмата „Три куси танцови чекори преку границата“; Наградата на Централноевропската иницијатива за најдобар европски писател до 35 години; и сега – Наградата за литература на Европската унија за романот „Сестрата на Зигмунд Фројд“. Романот „Разговор со Спиноза“, кој во Македонија доживеа пет изданија, е објавен и во Соединетите Американски Држави, Полска, Словенија и во Хрватска, а „Архипелаг“ од Белград го презентираше во рамките на едицијата „100 словенски романи“. (Н.П.)