Новинари од Радио Кавадарци останаа на улица

КАВАДАРЦИ - „Сопственичката на Радио Кавадарци, Трајанка Митрова, не го испочитува купопродажниот договор со Министерството за економија за Радио Кавадарци. Не' остави на улица, а ни должи плати и придонеси за околу две години“, обвинија поранешни новинари вработени во Радио Кавадарци. Од 17 вработени, шестмина добиле откази, неколкумина заминале како технолошки вишок, а дел се пензионирале. Иако во член 6 од договорот со Министерството за економија стои дека новиот сопственик има обврска во наредните пет години да ги задржи сите вработени, сепак, тоа не е испочитувано.

Тие се жалат дека, и покрај тоа што имаат правосилни пресуди потврдени од Апелационен суд, не можат да ги наплатат долговите, бидејќи извршителот им кажал оти Радио Кавадарци, освен аудиомиксер и половен автомобил, нема ништо друго. (A.Д.)