„Надеж“ пред Антикорупциска

Кабинетот на Иванов објави дека Црвенковски исплатил 340.394 евра на тројца словенечки консултанти

Катица Чангова

Случајот на поранешниот шеф на државата, Бранко Црвенковски, стигна и пред Антикорупциската комисија. По сопствена иницијатива, тимот на Илми Селами ќе го истражува случајот „Надеж“ откако јавноста ја разбранува веста во медиумите што се потпира на податоци од објавен клип на „Јутјуб“, а според кои експретседателот Црвенковски потрошил 500.000 евра на тројца словенечки експерти за односи со јавноста.

За откривање на вистината, антикорупционерите веќе оформиле предмет и побарале официјални документи и од Кабинетот на актуелниот претседател Ѓорге Иванов и од неговиот претходник, Бранко Црвенковски. „Откако ќе ги прибереме информации, ќе создадеме целосна фактичка состојба и ќе се произнесеме за овој случај“, најави првиот антикорупционер. Селами очекува од Црвенковски да каже дали се точни објавените информации.

И додека Антикорупциска влегува во истрага, Кабинетот на Ѓорге Иванов вчера соопшти дека Кабинетот на претседателот во време кога Бранко Црвенковски ја извршуваше функцијата исплатил 340.394 евра на три лица од Словенија со кои склучил договори за соработка, обезбедување развој и истражување.

„Ова е утврдено по досегашната проверка на документацијата која постои во архивата на Кабинетот во врска со случајот ‘Надеж‘, извршена во согласност со Законот за слободен пристап до информации од јавен карактер, а по јавно изнесеното барање од Кабинетот на поранешниот претседател Црвенковски и интересот на медиумите за добивање прецизни информации за ангажманот на консултантите од Словенија“. Кабинетот на Иванов прецизира дека „договорите се потпишани од тогашниот генерален секретар на Кабинетот“. Притоа, во детали ги открива износите што биле префрлени од буџетот на претседателот на Македонија за консултантите од Словенија. Станува збор за 20.764.057 денари, односно за 340.394 евра. Во соопштението од Кабинетот на Иванов се наведува дека на првиот консултант од Словенија му се исплатени 8.305.626, односно 136.157 евра, на вториот 5.149.482 денари, односно 84.417 евра, а на третиот консултант 7.308.949 денари, односно 119.818 евра.

„Излегуваат во јавноста со податоци за вкупната сума за ангажирање консултанти во целиот мандат на претседателот Црвенковски, а до вчера пласираа информации дека само во 2009 година се потрошени 500 илјади евра, што и самите потврдија дека е ноторна лага“, рече портпаролот на СДСМ, Емилијан Станковиќ, на вчерашната прес-конференција. Според него, продолжуваат грубите манипулации и конструкции на власта, кои очигледно се реализираат преку марионетата на Груевски и на ВМРО - ДПМНЕ, Иванов. „Колку за илустрација, во тригодишниот период, сметано од 2006 до 2009 година, целата Влада на Груевски потроши најмалку 30 милиони евра народни пари на кампањи. Од нив, државниот ревизор за 2007 и за 2008 година констатирал дека само од Генералниот секретаријат на Владата се потрошени рекордни 18 милиони евра за кампањи и реклами. Оттука, граѓаните и јавноста нека прават споредба кој, како и колку совесно ги троши народните пари“.