Кривични пријави поради инсулин

Управата за финансиска полиција поднесе кривична пријава против Ч.Д. (62), директор на Клиниката за ендокринологија, дијабетес и метаболични нарушувања, поради злоупотреба на службената положба и овластување. Според пријавата, Ч.Д. од август 2008 година до декември 2009 година извршил набавки на инсулин спротивно на Законот за јавни набавки, односно не објавил меѓународни огласи за доделување договори за јавни набавки.

„Со ова тој ги привилегирал домашните понудувачи АД ’Реплек‘ (дистрибутер за Македонија на производителот ’Новонордиск‘ - Данска) и ’Д-р Пановски‘ (дистрибутер за Македонија на производителот Авентис - Франција), од каде што извршил набавки на инсулин во вкупна вредност од 3,52 милиони евра. Притоа, во периодот од 2007 до 2010 година за себе од застапникот на производителот ’Новонордиск‘ во континуитет остварувал приходи во вкупен износ од 5,94 милиони денари“, се вели во соопштението на Финансиската полиција. Освен тоа, Ч.Д., наводно, од 25 јуни до 23 јули годинава извршил и јавна набавка на стар ехоапарат, кој бил деклариран како нов, иако од 2006 година бил во негова лична сопственост. Во соопштението се наведува дека годинава била, поднесена и кривична пријава против Д.К. (54) и С.Б. (46), директори на Клиничката болница „Д-р Трифун Пановски“ во Битола.

„Тие од мај до септември 2008 година, спротивно на Законот за јавни набавки, извршиле набавки на лекови во вредност од 2,6 милиони евра“, се тврди во соопштението.