Претходен број

Едиторијал

Сиромашен народ - успешна влада!

Нина Нинеска - Фиданоска

Може Владата и понатаму да не' убедува дека со нејзините мерки и напорната работа веќе се подобрил животниот стандард на граѓаните. Можат владините министри и понатаму да се гордеат со своите проекти кои, според нив, ја направиле Македонија подобро и побогато место за живеење.

Но, изгледа дека не било сосема така. Од сите тие „ударнички“ владини подвизи на планот на економијата, факт е дека македонските граѓани и натаму останале сиромашни. Или изразено преку прецизни статистички бројки, сиромаштијата во Македонија на крајот на 2007 година изнесувала 29,4 проценти. Тоа значи дека речиси секој трети граѓанин во земјава е сиромашен.

Бројките се немилосрдни. Тие покажуваат дека во споредба со пред две години, сиромаштијата се намалила само за 0,6 процентни поени. Така, таа во 2005 година изнесувала 30 отсто, во 2006 била на ниво од 29,8 проценти, а на крајот на минатата година 29,4 отсто. Токму од тие причини произлезе и загриженоста на тимот на Светска банка, кој беше принуден да констатира дека, и покрај сите мерки, сиромаштијата се' уште е прилично раширена во нашата држава.

Она што уште повеќе загрижува е фактот што оваа година сиромаштијата не само што нема изгледи да се намали, макар и симболично, туку, напротив, сосема извесно е дека повторно ќе покаже многу повисоки вредности. Има многу аргументи што одат во прилог на таа теза, а ќе спомнеме само неколку. Главниот е што инфлацијата не престанува да расте од почетокот на годинава, а последниве неколку месеци зголемувањето на цените не се симна под нивото од 10 отсто. За толку проценти секој месец се „подјадени“ и онака ниските примања на граѓаните, со оглед на фактот што освен кај државната администрација, ретко која друга компанија ги з��олеми платите на своите вработени.

Бензинот сега е речиси двојно поскап отколку на крајот на минатата година. Покрај екстремно скапото „црно злато“, деновиве главната топ-лоша вест е новата цена на парното, која е повисока за драматични 60 проценти, а ќе почне да ги „гори“ граѓаните веќе од август. И струјата само што не поскапела, а според прогнозите на некои аналитичари, не ни гине повисока цена за близу 30 отсто, иако таа информација засега не е потврдена.

Тоа, пак, во превод значи дека Македонија ќе се „збогати“ со нова армија сиромашни луѓе. На вакви застрашувачки поскапувања, дури и онаа каква-таква средна класа што досега постоеше во Македонија, сега ќе се претвори во сиромашна.

И токму тука се поставува прашањето: во што се гледа економскиот успех на оваа Влада? ВМРО-ДПМНЕ пред две години успеа да го освои владејачкиот трон токму заради економијата, затоа што ветуваше дека луѓето ќе живеат подобро и побогато отколку порано. Се најавуваше дека во земјава ќе влезат многу нови странски инвестиции, ќе се намали невработеноста, а граѓаните ќе добиваат повисоки плати... А на што се сведе во најголем дел економскиот епилог - на безброј повисоки сметки и страв да се влезе во продавница поради големата скапотија. Не е спорно дека инфлацијата е увезен феномен. Но, Владата е таа што мора да менаџира и да се справи со порастот на цените, а не само да бара оправдувања за себе. Таа по втор пат го доби мандатот, и тоа со уште поубедлива победа, и сега мора да ги решава тешките прашања.

За жал, од тоа што можевме да го видиме досега, власта не покажа многу чувство за маките на граѓаните, а особено за оние кои живеат на прагот на сиромаштијата. И наместо да се зафати со вистинските економски проблеми, Владата се занимава со „патриотска“ економија, терајќи ги трговците да воведуваат патриотски фискални каси, а фирмите да си ги сменат имињата, бидејќи досега не биле доволно патриотски!