Претходен број

МРТ ќе се ликвидира за да се формира нов јавен сервис

Како причина за Предлог-законот Владата ја наведува кризата во МРТ, која не можела да се надмине со други методи

Александар Пешев

Собранието го усвои предлогот на Владата со кој се овозможува поведување стечајна постапка и ликвидација на Македонската радио-телевизија. Оваа можност е предвидена со измените на Законот за радиодифузна дејност кој беше на дневниот ред на вчерашната седница на Собранието.

Како причина за поднесување Предлог-законот Владата ја наведува кризата во јавниот сервис, која досега не можела да се надмине со други методи.

„МРТ првенствено поради напластените долгогодишни проблеми и долгови не е во состојба да ја извршува функцијата на ефикасен, функционален, транспарентен и независен јавен радиодифузен сервис во согласност со европските стандарди“, се констатира во Предлог-законот.

Измените во Законот се предвидени во неколку члена, вклучувајќи го и член 12, во кој се додава „над јавното радиодифузно претпријатие и над трговското радиодифузно друштво може да се спроведе постапка за ликвидација или да се отвори стечајна постапка“.

Со предлог-измените се отвора и можноста средства од Буџетот директно да се влеваат во јавниот сервис. Во член 145 под став 1, предложено е додавање нов став кој би требало да гласи „За постигнување и одржување на поголем степен на програмски и техничко-технолошкиот развој на Јавниот радиодифузен сервис можат да се издвојуваат и средства од Буџетот на Република Македонија“. Измени се предвидени и во член 148 од Законот за радиодифузија. Со овие измени радиодифузната такса се одредува на 130 денари месечно. Менувањето на висината на оваа такса, согласно со Предлог-измените, би требало да се случува еднаш годишно, зависно од висината на трошоците за живеење.

Неофицијално се дознава дека во план е промена на таканаречениот „француски модел“, со кој по ликвидацијата на МРТВ и отпуштање на вработените, претпријатието би се пререгистрирало под нов назив и повторно би ги вработило само оние кадри кои се потребни за успешно функционирање на јавниот сервис. Според неофицијални извори, во план е менување на називот на јавниот сервис од „Македонска радио-телевизија“ во „Радио-телевизија на Македонија“.

Предлог-законот, кој се носи под итна постапка, ја збуни експертската јавност и другите релевантни институции од областа на радиодифузијата. Од Советот за радиодифузија одбиваат да дадат коментар за предлогот на Владата. Неофицијално се дознава дека Советот воопшто не бил консултиран во однос на измените на Законот за радиодифузна дејност.

Експертите тврдат дека донесувањето вакви измени во Законот е во спротивност со постојната регулатива. Роберто Беличанец од Центарот за развој на медиуми посочува дека досега нема пример во светот на ликвидација на јавен радиодифузен сервис.

„Секако дека е потребно да се изнајде некакво решение за Македонската радио-телевизија и потребно е да се преземат радикални чекори. Но, би било апсурдно претпријатието да се стави под стечај поради фискални причини. Има модели според кои може да се среди ситуацијата во МТВ, од донесување закон за санирање до концесионирање на некои менаџерски тимови однадвор или од самото претпријатие“, вели Беличанец.

Од Синдикатот на МРТВ тврдат дека не биле информирани, ниту, пак, биле консултирани за измените во Законот за радиодифузија.