Бензините поскапуваат за 1,5, а дизелот за половина денар
Цената на бензините од ноќеска на полноќ се зголемува за 1,5 денари за литар, а на дизелот за половина денар за литар. Според одлуката на Регулаторната комисија за енергетика, се врши зголемување на рафинериските и на малопродажните цени на нафтените деривати во просек за 3,36, односно за 2,41 отсто.
Новата цена на моторниот бензин МБ-96 ќе изнесува 74,50 денари за литар, ЕУРОСУПЕР-95 ќе се продава за 71,50, а ЕУРОСУПЕР-98 за 72,50 денари за литар. ЕУРОДИЗЕЛ (Д-Е 4) ќе чини 67,50, екстра-лесното масло за домаќинство (ЕЛ) 56, а екстра- лесното масло за домаќинство-1 (ЕЛ-1) 56,50 денари за литар.
Со одлуката на РКЕ за 1,2 денара за килограм се зголемува и малопродажната цена на мазутот М-2 , која сега ќе изнесува 35,640 денари за килограм.
Како причина за зголемување на цената на горивата од РКЕ го посочуваат зголемувањето на курсот на доларот за 3,32 отсто во однос на денарот. (МИА) |
