Зголемен сообраќај и брзини на пакетите Макс АДСЛ по иста цена
„Македонски телеком“ АД - Скопје воведува новитети во Макс АДСЛ. Почнувајќи од 1 септември годинава, се зголемува месечниот сообраќај кај сите пакети Макс АДСЛ и за постојните и за новите корисници на оваа услуга. Во текот на овој месец корисниците ќе имаат можност и да уживаат во неколкукратното зголемување на брзините, кое најпрво ќе го почувствуваат новите корисници, а до крајот на месецот и постојните корисници, и сето тоа по исти непроменети цени.
Зголемувањето на брзините и на месечниот сообраќај по истата цена важи за приватните и за деловните корисници на овие пакети.
Со новините кај Интернетот за приватните корисници, постојниот пакет Макс АДСЛ 2 станува Макс АДСЛ 10, а досегашната брзина од 1536/256 килобајти во секунда се зголемува на 4096/768. Пакетот Макс АДСЛ 10 се модифицира во Макс АДСЛ 25, а брзината од 3072/512 килобајти во секунда се зголемува на 5120/768.
Неколкукратното зголемување на брзините и на месечниот сообраќај, почнувајќи од септември, добиваат и деловните корисници. Пакетот Макс АДСЛ Про 100 се модифицира во Про флат, со што месечниот Интернет-сообраќај станува неограничен, а брзината се зголемува од 6144/768 килобајти во секунда на 8192/1024. „Македонски телеком“ и понатаму ќе продолжи да ги следи потребите на корисниците со воведување новитети на македонскиот пазар, а притоа задоволувајќи ги светските телекомуникациски стандарди за висококвалитетни услуги.
