Насловна

МВР одговори, ништо не кажа

Младите што протестираат по убиството на Мартин Нешковски добија штури одговори за расветлување на случајот и згрозени се од иронијата и од цинизмот во јазикот на оваа државна институција

Бојан Шашевски


Демонстрантите се заблагодарија вчера на ажурноста и на брзата реакција од Министерството за внатрешни работи, кое одговори на прашањата за убиството на младиот Мартин Нешковски. Но, како што соопштуваат, како млада група ослободени од каков било притисок, воопшто не се задоволни со одговорите на МВР, туку се згрозени од иронијата и од цинизмот на одговорот што не прилега за една формална државна институција.

„МВР во едно од своите соопштенија за јавност во текот на вчерашниот ден призна дека до 2006 година работело под влијание на СДСМ, а од 2006 година е под влијание на ВМРО-ДПМНЕ, па оттука не ни е јасно со кој рационален аргумент може да се спротивстават на иницијативата за независен систем на контрола од страна на независна група граѓани“, се вели во вчерашното соопштение на младите демонстранти.

Исто така, во објавата стои дека се разочарани од нивото на свесност на МВР за концептот на човекови права. По добиениот одговор, демонстрантите велат дека произлегува оти за МВР човековите права се гарантирани затоа што сме добиле визна либерализација и затоа што Македонија членува во Поткомитетот против тортура при ОН.

„Тоа е точно ако човекови права значат закон за државјанство, Охридски рамковен договор и неколку стратегии за заштита на Роми (условите за визна либерализација под точка 4), и ако Буркина Фасо и Мексико ги сметаме за земји каде што се почитуваат човековите права, бидејки и овие две земји учествуваат во Поткомитетот против тортура при ОН“, велат незадоволните граѓани.

Младите сметаат дека својот одговор МВР повторно го насочува кон партиски војници и го потврдува својот став дека светот е црно-бел.

„Дали припадниците на МВР заборавија дека некогаш и тие беа млади, убави и независни? Во нашиот свет има многу бои и слободна критичка мисла, затоа во следниот период ќе доставиме коментар во однос на одговорите на нашите барања доставени од МВР“, велат демонстраторите.

Тие упатуваат уверување до Полицискиот синдикат дека воопшто немаат намера да го напаѓаат целиот полициски состав, туку дека во доставените барања јасно стои нивниот став за повторно регулирање одредени норми и правила кои, според нив, очигледно не функционираат во правниот систем.

„Критиката и преиспитувањето се основни човекови постулати олицетворени во максимата - повторувањето е мајка на знаењето. Затоа, ќе ве замолиме уште еднаш да ги прочитате нашите барања со здрав разум и чиста мисла и да ни се придружите во креирањето подобра иднина, бидејќи и ние сме ваши деца“, соопшти Координативното тело за односи со јавноста на граѓанската иницијатива против полициската бруталност.

Младите демонстранти за денеска најавуваат нови протести и блокирање на улиците се' додека не добијат соодветни одговори и реализирање на барањата.

За потсетување, еден ден откако револтираните граѓани ги дефинираа и ги доставија своите барања до надлежните институции, младите демонстранти, но и македонската јавност добија од Министерството за внатрешни работи штури и неконкретни одговори за расветлувањето на убиството на Мартин Нешковски.

По побараните оставки на министерката Гордана Јанкулоска и на портпаролот на МВР, Иво Котевски, но и праведна казна за осомничениот „тигар “ и кривична одговорност за сите лица кои се обидоа да го прикријат случајот, МВР соопшти дека одговорноста за трагичниот настан е индивидуална, а поголемиот дел од барањата се веќе исполнети.

Младите, кои веќе единаесетти ден неуморно маршираат по улиците против полициската бруталност и бараат почитување на основните, универзални човекови прави од сите институции од системот, велат дека им возвратија со неконкретни одговори и политизирање на нивните барања.