Насловна

Преговорите меѓу ВМРО-ДПМНЕ и ДУИ во ќор-сокак

Неофицијално се тврди дека причина за блокирање на преговорите е тоа што на чело на тимот на ВМРО-ДПМНЕ бил поставен Сашо Мијалков

Светлана Унковска



Меѓукоалициските преговори меѓу ВМРО-ДПМНЕ и ДУИ западнаа во криза и од вчера партиските работни групи ги прекинаа средбите. Извори од ДУИ ги потврдуваат ваквите состојби и велат дека не се знае кога повторно ќе се сретнат партиските групи. Истовремено додаваат оти нивните очекувања се дека во овој процес ќе се вклучат претставници на меѓународната заедница во земјава со цел да се деблокираат разговорите.

Според неофицијални информации, главна причина за тоа бил фактот што на чело на преговарачкиот тим на ВМРО-ДПМНЕ бил поставен директорот на УБК, Сашо Мијалков. Иако и претходно одржаните средби не течеле ни малку лесно, сепак, исклучително напната атмосфера се создало на завчерашната средба, кога целиот преговарачки тим на ДУИ бил изненаден од тоа што Мартин Протоѓер бил заменет со Мијалков. Интегративците ваквиот потег го толкуваат како еден вид тактички потег на ВМРО-ДПМНЕ, со кој сакаат да испратат лоша порака. Истовремено тоа го доживуваат и како силен притисок врз нивниот преговарачки тим. Ова се подразбира, особено откако пред изборите на „Викиликс“ беше објавена информацијата дека лидерот на ДУИ, Али Ахмети, се жалел кај американскиот амбасадор, Филип Рикер, од Никола Груевски, кој, како што тогаш изјавил, бил под силно влијание токму од Сашо Мијалков.

Муса Џафери, како дел од преговарачкиот тим на ДУИ, за „Утрински весник“ изјави дека информациите за наводна загрозеност на процесот на преговори се чиста шпекулација и оти и двата тима одговорно и темелно работат на постигнување договор за утврдување заедничка владина програма.

„Не постојат несогласувања, се работи на заедничка програма и сите страни се одговорни и многу се внимава како да се состави владината програма. Глобално се залагаме нашата партиска програма да биде и дел од владината и моите процени се дека 70 проценти од таа програма веќе е готова“, ни изјави Џафери. Сепак, тој не беше многу убедлив во отфрлањето на информациите дека постојат сериозни тешкотии во преговорите, за што говори и самиот факт дека, иако немаат постигнато договор околу степенот на нивното суштинско учество во власта, Џафери не знаеше да одговори дали и кога повторно ќе имаат средба како работни тимови.

„Ќе се состанеме кога ќе имаме потреба. Досега имавме редовна комуникација“, кусо одговори Џафери.

Доброупатени извори потврдуваат дека има големи тешкотии во постигнувањето заеднички договор меѓу коалиционите партнери и тоа за барањата на ДУИ околу решавање на статусот на борците на ОНА, затворање на хашките предмети, за нивно суштинско учество во заедничката владина програма, како и за одредување договор околу забрзување на евроинтеграциските процеси на земјава, што подразбира и затворање на спорот со името.

Министерот за образование, Никола Тодоров, запрашан дали ќе остане на истата функција или е можно и тој да ротира, како што се тврди или во Министерството за транспорт и врски или во МВР, вчера не сакаше ниту да потврди ниту да демантира.

„Нема ништо да коментирам, но каде и да одам ќе работам исто, професионално“, рече Тодоров. Засега остануваат информациите дека ДУИ инсистира на тоа да има баланс во ресорите. Партијата на Ахмети, покрај местото шеф на парламентот за кое сериозен кандидат е Теута Арифи, ќе бара и клучни министерства, меѓу кои и МВР. Доколку не го добие ова Министерството, ДУИ ќе ја бара директорска позиција во УБК. Исто така, и Министерството за финансии е во списокот на интегративците, потоа и министерствата за одбрана, за транспорт и врски или за економија.