Професорска сајбер-војна околу младинските протести
Гордана Дувњак
Протестите на младите по повод бруталното убиство на 22-годишниот Мартин Нешовски ги раскара на социјалните мрежи и универзитетските професори. Двете познати интелектуалки, активистки за човекови права и блогерки, Билјана Ванковска и Мирјана Најчевска, деновиве влегоа во жесток судир на нивните профили на „Фејсбук“, кој на моменти дури изгледаше и невкусно поради речникот што го користат. Тоа предизвика и лавина реакции од корисниците на ФБ што се ставија во одбрана на едната или на другата страна, но ја искористија и можноста за изнесување сопствени ставови за самиот карактер на протестите.
Повод беше колумната на професорката Билјана Ванковска во еден од печатените медиуми под наслов „За политиката и човечкиот живот“. Во неа, меѓу другото, ќе напише: „По изборите, кои покажаа слика на политички (и етнички) биполаризам, оваа независна енергија што се манифестира на улиците е зрак на надеж дека нема да потонеме во мрак на целосна партитократија и етнократија. Единствената причина зошто ме нема на улиците е затоа што сметам дека ние што потфрливме како интелектуалци, професори, бивши министри, НВО-активисти и борци за човекови права и што ли уште не, треба да им го препуштиме водството. Тие го зграпчија денот! Нека им е со среќа!“
На ваквиот став на својата поранешна колешка, од Хелсиншкиот комитет бурно реагираше Најчевска, која на својот статус ќе го запише следново: „Интелектуалните инвалиди од сортата на Ванковска одамна го трујат цивилниот сектор и академската заедница. Ја поздравувам нејзината одлука да не излезе на улица затоа што според досегашното искуство со нејзиниот активизам се' што допрела го извалкала и го разрушила. Самата позиција што ја промовира за повлекување на возрасните и оставање на младите да ја бијат битката е толку морбидно одвратна што морам да ја оспорам“.
Да биде мешаницата уште поголема, се погрижи и Јанко од „Јади бурек“, кој на својот ѕид ќе ја постира преписката меѓу двете професорки и нема да одолее да се искаже во свој стил. „Баба Зумбула, алијас Најчевска, и нејзиниот наци-приод на подобност на ФБ. Ај ја разбирам да ме блокира мене, јас сум... секаков, нели... Но, да ја блокираш професорката Ванковска е акт што е рамен на климактерична хистерија. Срамно, ниско, подло, простачки, одраз на хормонален дисбаланс и интелектуален дегенеративен процес... премногу гледам д-р Хаус...“
Ни Ванковска нема да остане должна, па на својот профил ќе прокоментира: „Вака сега... Јанко употребил речник што не ми се допаѓа, и јас имам повеќе култура од д-р Најчевска, ама ова вреди да се сподели. Ај што политичариве немаат култура на дијалог, ама кога професор си дозволува уличарски речник - немам коментар“.
Дали во случајов со споменативе две дами се работи за несогласување и судир на идеи или, пак, во прашање е нешто друго? Професорката Ванковска не крие дека конфликтот со Најчевска е со постар датум и трае повеќе од пет години.
„Првите несогласувања се случија уште во времето кога јас бев член на Хелсиншкиот комитет, кога по една моја критички настроена колумна во еден неделник за состојбите во цивилниот сектор, Најчевска бараше да си дадам оставка. Но, нејзиниот обид за мое разрешување заврши со оставки на повеќе членови на бордот, кои се ставија на моја страна“, подвлекува Ванковска. Таа вели дека Најчевска дури и не и' е пријателка на ФБ, но затоа по објавувањето на нејзината колумна, побрзала да ја прокоментира на социјалната мрежа.
„Очигледно Најчевска не ја разбрала поентата и ја промашила, бидејќи мојата заложба не беше против тоа на протестите да се појават возрасните, туку дека таму не им е место на некои познати имиња што би можеле да им наштетат на младите и да ја дискредитираат нивната благородна идеја“, тврди Ванковска. Таа вели дека се срами од начинот на кој е водена полемиката, бидејќи не се води за ставови, туку користи лични квалификации, навреди, што е недолично за луѓе од науката кои образуваат млади кадри.
Најчевска, пак, објаснува дека била испровоцирана, бидејќи, како што вели, со Ванковска не се согласуваат во повеќе базични работи, но овде влогот бил преголем, а штетата што може да се направив голема. Таа смета дека со ваквите ставови, нејзината колешка и' оди од рака на власта. „Недозволиво е професор што има влијание кај младите да повикува возрасните да се држат настрана. Младите не смеат да се остават сами, а возрасните се должни да се појават на протестите, бидејќи ова е заедничка битка за демократија. Само активни граѓани, ослободени од апатија можат да ги коригираат негативните појави во општеството. Утре на протести, ќе излезат пензионери. Дали младите тогаш треба да се држат настрана и да не се интересираат за нивните проблеми. Силата е во заедничката акција“, потенцира Најчевска. |
