ММФ мудро воздржан
Шефот на Мисијата, Мекгру, вели дека Фондот се' уште е на стартот на скенирањето, но ќе се дискутира и за повлечените пари
Неколку дена откако се присутни во земјава, монетарците и натаму се крајно воздржани и внимателни во давањето изјави што ја интересираат македонската јавност. Шефот на Мисијата на Меѓународниот монетарен фонд, Вес Мекгру, вчера само кусо изјави дека тие се на почетокот на разговорите и дека засега се' уште се скенира ситуацијата. Немаше конкретен одговор ниту на прашањето дали во ММФ беа изненадени кога Владата пред изборите реши да повлече 220 милиони евра од аранжманот за претпазливост што и' беше одобрен.
Сепак, монетарецот не пропушти да потсети дека тие се дојдени овде, меѓу другото, и за да проверат како и зошто се повлечени и потрошени дел од средствата од монетарниот заем.
„Нашата посета има две цели. Едната е да ги анализираме ситуацијата, економијата, финансискиот сектор, плаќањата. А втората е да дискутираме за повлечените средства од кредитната линија, а тоа се анализира на секои шест месеци. И понатаму ќе имаме разговори, се среќаваме со претставници на Владата, Народна банка на Македонија, бизнисмени и со претставници на Европската унија. Се надеваме дека по сите нив ќе имаме можност да одговориме на поконкретни прашања. Но, засега сме на почетокот, па би почекал со моите коментари“, изјави вчера шефот на монетарната мисија, Мекгру, по средбата со претставниците на ЕУ во Македонија.
Ваквата воздржаност на строгите монетарци може да се каже дека ја предвидуваше економската експертска фела во Македонија, поврзувајќи ја со сериозниот политички момент во кој се наоѓа земјава, но и со надежите на меѓународната заедница дека откако ќе се формира, конечно, новата влада ќе собере сили да најде солуција за спорот со името со јужниот сосед. Но, некои од економистите се убедени дека доколку најде лоши бројки или ненаменски трошења, Фондот нив нема да ги премолчи и ќе најде начин да и' ги соопшти на македонската јавност.
Дел од експертите со кои контактираше „Утрински весник“ беа скептици оти Мисијата на ММФ во текот на оваа посета би можела да излезе со гласни критики кон македонските власти за начинот на кој пред изборите повлекоа 220 милиона евра од заемот, како и за намените за кои се потрошени дел од овие пари. Тие сметаат дека монетарците ќе се воздржат од незгодни прашања, бидејќи не би сакале да долеваат масло на огнот и со тоа дополнително да ја искомплицираат и така сложената политичка ситуација во Македонија. „Од Владата ќе ги молат претставниците на ММФ јавно да не зборуваат, а и тие, најверојатно, ќе прифатат да молчат. Ние, пак, подоцна ќе дознаеме колку и за што биле потрошени парите“, прогнозира поранешниот министер за финансии, Џевдет Хајредини.
Други аналитичари, пак, коментираа дека тонот на конечните изјави на претставниците на ММФ ќе зависи, пред се', од она што тие ќе го „откријат“ во финансиската и во буџетската слика на Македонија, односно дали ќе најдат или не одржливи параметри во државниот буџет. „Ако од ММФ најдат дека со буџетот ќе оди тешко до крајот на годинава, што не е исклучок, тогаш сигурно ќе дадат некој вид сигнал, а тие ќе проценат дали ќе биде груб или ќе има посмирен тон. Сепак, треба да се има предвид дека тие секогаш се воздржани и не сакаат да влегуваат во политички дебати“, објаснува Ванчо Узунов, професор на Правниот факултет.
Деновиве дел од експертската јавност во земјава не ја исклучува и тезата дека кредитот од ММФ значи еден вид политичка поддршка за Владата и исходот од разговорите со ММФ ќе зависи од сигналите што нашите власти ќе ги испратат до меѓународната заедница, во смисла на тоа дали се подготвени да најдат решение за долгогодишниот спор за името со Грција. (Н.Н.Ф.) |
