Панихиди за Тодор Александров

ВМРО-ДПМНЕ и ВМРО-НП паралелно ја одбележаа 88-годишнината од смртта на контроверзниот штипјанец

Иван Бојаџиски



Штип – Две панихиди по повод 88-годишнината од смртта на Тодор Александров се одржаа вчера во црквата „Успение на пресвета Богородица“ во штипско Ново Село. Здружението на почитувачи на ликот и делото на Александров и ВМРО-НП, меѓу кои долго време постои голем анимозитет во однос на прашањето кој има повеќе право да го чествува Александров, и годинава не успеаја да се договорат да го направат тоа заедно. Поради тоа се одржаа две панихиди за една иста личност во еден ист ден.

Први панихида организираа членовите на Здружението на почитувачите на ликот и делото на Александров. Во новоселската црква се собраа околу 150 граѓани на Штип, доминантно членови на ВМРО-ДПМНЕ. На панихидата присуствуваше и министерот за труд и социјална политика, Спиро Ристовски, кој пред новинарите само кусо изјави дека на овој настан присуствува како приватно лице, а не како член на Владата. Ристовски не сакаше да дава никакви изјави за неговиот личен став кон ликот и делото на лидерот на ВМРО од дваесеттите години на минатиот век.

Панихидата ја предводеше митрополитот на Брегалничката епархија, владиката Иларион, со свештенослужители. По завршувањето, пред новинарите даде изјава само градоначалникот Зоран Алексов. „Оваа река од народ кој денес дојде во црквата да му оддаде почит на Тодор Александров како наш сограѓанин и еден од најголемите македонски синови ни дава јасен сигнал во однос на тоа колку го цениме и почитуваме неговото дело. Треба да престанеме со анатемисувањето на сите македонски дејци од минатото и на историјата да и' погледнеме со очите на вистината и да ги почитуваме сите дејци кои направиле добрини за македонскиот народ. Сакам да ги потсетам сите оние што го обвинуваат ВМРО-ДПМНЕ дека ние сме партија која сака да ја промени историјата на македонскиот народ, дека таквите мислења се резултат на нивните гледања на нашите историски случувања во изминатите 70 години кога се извртувани сите факти од нашата историја. Ова што го гледаме денес, полна црква, луѓе со пиетет кон големото дело на Александров, тоа е вистинската историја на Македонија. Ние ќе продолжиме да ги славиме сите потомци од тоа време родени во Штип“, рече Алексов.

На панихидата присуствуваа и петнаесетина члена на бугарската партија ВМРО-БНД на Каракачанов. Јулијан Ангелов, млад човек кој имал високи позиции во оваа партија, ни рече дека дошол на панихидата воден од својот личен став дека Македонците и Бугарите биле два братски народа и дека сме требало заедно да ги чествуваме историските личности. „Таквите личности и заедничките обележувања ќе ни помогнат да се обединуваме, а не да се делиме“, рече овој млад Бугарин. Штипјанецот Петре Колев, кој за време на гостувањето на една штипска телевизија го негираше постоењето на македонската нација тврдејќи дека сме биле Бугари, а кој во партијата на Каракачанов е идеолог за Македонија и, како што ни рече, „некои други држави од Балканот“, не сакаше да даде изјава. Само информира дека на денот кога Штип му прави панихида на Александров, тој бил тука за да го формира друштвото за Македонско-бугарско пријателство.

Само што заврши оваа панихида, во црквата пристигнаа и членови на ВМРО-НП за да запалат свеќи и да му оддадат почит на лидерот на ВМРО. Локалниот лидер на ВМРО-НП, Зоран Костовски, и' беше лут на Брегалничката епархија која не дозволила нивни свештеници да се појават на нивното чествување и да одржат панихида.

„Ние сме партија која го започна чествувањето на ликот и делото на Александров и црквата не смееше да не одбие. Таа само покажа колку е врзана со владејачката партија, а не со народот“, рече Костовски. Од друга страна, митрополитот брегалнички Иларион ни рече дека од црковен аспект не е можно за една личност да се прават две панихиди во една година.