Попоски не прима извештај без „македонски“

Целта на Македонија не е план под маса во ЕУ како да се заобиколи Грција

Слободанка Јовановска



Шефот на дипломатијата Никола Попоски му прати вчера политичка порака на Брисел дека нема да го прими извештајот на Европската комисија за напредок на земјата за годинава доколку во него не е содржан зборот „македонски“, со оценка дека ќе биде „динамит за правната рамка на ЕУ“ ако тоа сепак се случи. Иако еврокомесарот веќе ја употреби придавката еднаш и таква препорака дојде и од Европскиот парламент, со овој став Попоски, пред престојот во Брисел идната недела со шефот на државата Ѓорге Иванов, сака да ги пресретне грчките притисоци кои би довеле до враќање назад на оваа одлука на ЕУ.

„Враќањето на придавката ’македонски’ би било логично од аспект на вредностите што ги промовира Европската унија. Дали тоа ќе се случи или не, зависи единствено од тие што го подготвуваат извештајот. Доколку би се случило тоа, би било нешто што би одело во вистинска насока. Дали Грција ќе се фокусира на отстранување на блокадата во согласност со интересот на сите земји од регионот или ќе ја троши енергијата на бришење придавки и додавки, е исклучиво прашање на нивна одлука. Сакаме да видиме дека енергијата ќе ја фокусираат на првото, а не на второто“, рече Попоски.

Најважно според него е на третата сесија од Пристапниот дијалог на високо ниво на 17 септември земјата да испорача што повеќе резултати, со оценка дека наш најсилен аргумент е што секоја година сме „се' подобри и подобри“. Дали има некој план под маса да се протнат преговорите со Македонија без Грција, беше прашање на кое министерот одговори дека тоа не е наша цел, туку да го добиеме она за што сме ги исполниле услови, т.е. дека Македонија нема затворено ниту една врата за Грција и дека не работи против нејзините интереси, но таа не треба да работи против интересите на сите. Според него, во ЕУ е создадена критична маса на земји кои ја согледуваат неопходноста од придвижување на процесот на евроинтеграција на Македонија во Унијата. Притоа, тој потврди дека на неколкуте рокови за средба што ги даде премиерот Никола Груевски, грчкиот лидер и натаму молчи и не одговара.

„Најсилен сигнал би било доколку премиерот на Грција одговори позитивно со прифаќање средба по отворената понуда што му беше упатена од премиерот. До овој момент немаме таков одговор и покрај конкретните сугестии кои ги дадовме“, рече Попоски, додавајќи дека ако и во иднина е така, ќе се запрашаме дали се искрени во изјавите дека сакаат решение, нафрлајќи дека изнаоѓањето изговори им беше специјалност досега.

Во врска со можноста Македонија да побара прием во ОН под уставното име на претстојното Генерално собрание на Светската организација, шефот на дипломатијата вели не е исклучена ниту една можност, но дека тоа не треба да се врзува сега со Генералната асамблеја. За притисоците од Бугарија изминативе неколку дена тој не виде простор за реакција, бидејќи станува збор за паушални оценки околу изложбата која целосно е договорена, а продолжува соработката со оваа земја.

Кога веќе именуваните амбасадори ќе заминат на функциите, дали некои од нив и покрај одлуката ќе останат во земјава и дали ќе се затвораат амбасади поради финансиската криза - беше следното прашање на кое Попоски одговори дека има временска динамика за нивното заминување која зависи од финансиските можности на МНР, т.е. едни ќе одат порано, а други подоцна, во зависност од тоа со колку пари ќе располагаат. Според него, ќе се искористат сите начини за штедење за да не се затворат некои амбасади, што би било крајно решение. „Како што рековте, шпекулација е дека Јован Донев не добил согласност од Лондон“, рече Попоски околу тврдењата во јавноста дека новоименуваниот амбасадор не бил пожелен таму.