Со „Животот на Молиер“ почнува „Ристо Шишков“



Вечерва во Струмица стартува 20. јубилејно издание на Фестивалот на камерен театар „Ристо Шишков“

Сузана Тасева

Јубилејното, дваесетто издание на Фестивалот на камерен театар „Ристо Шишков“ ќе стартува вечерва во Центарот за култура „Антон Панов“ во Струмица. Свеченото отворање ќе почне со поставување биста со ликот на бардот на македонското глумиште, Ристо Шишков, на платотото пред Центарот за култура каде што во изминатите дваесет години за единствената награда за високи актерски остварувања се натпреваруваа многубројни актери од домашната и странската театарска сцена.

Први на фестивалската сцена ќе настапат актерите од Македонскиот народен театар со претставата „Животот на Молиер“, во режија на Александар Поповски. Во шесте фестивалски дена ќе бидат изведени вкупно 15 претстави од домашната и странската театарска продукција во официјалната конкуренција.

Се' е подготвено за старт на годинашното јубилејно издание на фестивалот. Дваесет години за еден ваков фестивал не се малку и правиме се' фестивалот годинава да го има најдоброто и најсветлото издание досега. Затоа се потрудивме да имаме поголем број претстави. Вкупно 15 претстави ќе бидат изведени пред љубителите на театарот, а околу 70 актери ќе се натпреваруваат за единствената награда за високи актерски достигнувања“, вели Ване Ристов, директор на ФКТ „Ристо Шишков“.

Годинава на театарската сцена ќе видиме претстави од театрите во Македонија, но и од Словенија, Србија, Бугарија, Косово, Литванија, Англија и Грција. За добитникот на наградата ќе одлучува меѓународна жири-комисија, во која оваа година има членови од Германија, Албанија, Бугарија и Македонија, а претседател е минатогодишниот добитник на наградата, актерот Борис Чоревски.

„И годинава ќе ги имаме тркалезните маси, иако тие веќе ги нема на фестивалите, но ние сметаме дека тие се одлична можност да се разговара за театрите и актерите“, вели Ристов. Фестивалот и годинава е збогатен со повеќе придружни програми, меѓу кои промоциите на книгата „Актерот“ од Братислав Ташковски, посветена на големиот актер Ристо Шишков, како и на најновата книга „Избрани драми“ од Сашко Насев.

Фестивалот ќе заврши на 13 септември со доделувањето на наградата за најдобар актер, а која традиционално и годинава се состои од златен медалјон со ликот на Ристо Шишков и паричен износ од 1.500 евра.