06.09.2012, 12:41 „Ш ш ш“ - симболичен наслов за почеток на Македонската филхармонија
Сезоната на 27 септември ќе ја отвори исклучителниот швајцарско-италијански пијанист, Франческо Пјемонтези
Со концертот симболично насловен „Ш ш ш“, Македонската филхармонија на 27 септември во Домот на АРМ ја стартува новата концертна сезона за која најавува богата и разновидна програма. На овој прв концерт како солист ќе настапи исклучителниот швајцарско-италијански пијанист Франческо Пјемонтези, под диригентската палка на полскиот маестро Јануш Пшибилски, редовен гостин на македонската концертна сцена.
Како што велат од Филхармонијата, насловот на концертот доаѓа од изборот на композитори чии дела ќе се изведат - Роберт Шуман, Франц Шуберт и Арнолд Шенберг, чија пак, оркестрација на Брамсовото „Рондо Цингарезе“, за прв пат ќе прозвучи во Македонија.
Како солист, Франческо Пјемонтези особено се истакнува во неговата интерпретација на делата на Моцарт, Бетовен, Шуман,Брамс, Шопен, Дебиси и Равел, настапувајќи со Лондонската филхармонија, Симфонискиот оркестар на Би-би-си, Израелската филхармонија, Камерата Салцбург... Соработува со диригенти како: Зубин Мехта, Јиржи Белохлавек, Сакари Орамо, Васили Петренко, Михаил Плетњов, Тиери Фишер. Пјемонтези негува особен уметнички интерес кон камерната музика. Снима за „ЕМИ Класикс“ како дел од серијата „Марта Аргерич и пријателите“, а исто така и за „Клавес Рекордс“ оставајќи високо оценет запис на музика од Роберт Шуман и последниот албум за „Аванти Класик“ со музика на Хендл, Брамс, Бах и Лист.
Еден од новитетите кои ги најави оваа институција, е и редизајнираната веб-страница која гласи www.filharmonija.mk, на која е објавена целата концертна сезона, како и биографиите на солистите и диригентите. Во соработка со маркетинг агенцијата „Футура 2/2“, пак, стартува и новата кампања за сезоната 2012/2013, како и промотивната продажба на претплатничките циклуси „Фортисимо“, „Форте“, „Мецо“ и „Пијанисимо“, со промотивни цени за 10 насто пониски од вообичаените.
Од Филхармонијата истакнуваат дека претстојната концертна сезона изобилува со атрактивни солисти и диригенти, како и со музички дела кои досега не се изведувани на нашиот концертен подиум. По подолго време ќе биде изведено и македонско дело кое е специјално нарачано од Македонската филхармонија, а ќе биде избрано по пат на конкурс.
И во сезоната 2012/13, Филхармонијата ги задржува тематските циклуси „Виртуози“ и „Лауреати“. Најавени се настапи на исклучителни имиња од светската музичка сцена меѓу кои и победничката на Шопеновиот конкурс, пијанистката Јулијана Авдеева, потоа виолинистката Акико Суванаи - најмлада победничка на натпреварот „П. И. Чајковски“, потоа виртуозните пијанисти Жан-Ефлам Бавузе и Хусеин Сермет, харизматичниот гитарист Милош Карадаглиќ, светски реномираниот флејтист Филип Бернол, виолончелистот Лазло Фењо, виолистот Александар Земцов, како и еден од најдобрите светски трубачи - Сергеј Накарјаков.
Циклусот „Кирилица“, пак, на кој настапуваат македонски солисти, од оваа година е под покровителство на министерката за култура, Елизабета Канческа-Милевска. Во негови рамки ќе настапат виолинистите во подем - Емилио Перцан и Софија Никоска, талентираниот хармоникаш Александар Коловски, пијанистката Кристина Светиева, кларинетистите Здравко Ангелов и Игор Бакревски, како и нашиот најдобар сопран - Ана Дурловски, која ќе го изведе спектакуларниот и ретко изведуван концерт за колоратурен сопран од Ранхјолд Глиер.
И годинава, велат од Филхармонијата, нема да изостанат и симфониските концерти за најмладите, кои се под покровителство на сопругата на претседателот на Македонија, Маја Иванова.
Промотивната продажба на претплатничките циклуси ќе трае до 27 септември, а Македонската филхармонија, велат од таму, со кампањата „Купи билет за Македонска филхармонија“, настојува да ја поттикне свеста кај публиката за негување на културата и нејзините вредности. (Т.И.)
|
