„Магрива“: Ореви има, манипулации нема

Сопствениците на фирмата ги отфрлаат обвинувањата дека зеле субвенции за празна нива

Кавадарци - „Ореви има, манипулации нема“, велат Илија Сокаровски и Сашо Попов, сопственици на фирмата „Магрива“ од Кавадарци за која опозицијата завчера обвини дека добива околу 50.000 евра на име субвенции, иако има празна нива.

За да го докажат тврдењето, тие ги однесоа новинарите на насадите со 10 хектари ореви, 10 хектари цреши и 6,5 хектари кајсии. Велат дека ореви има и не се мистериозно исчезнати, а напразно биле обвинувани бидејќи субвенциите не биле педесетина илјади евра. „Ние сме земјоделци и не сакаме некој да не' користи за собирање политички поени“, велат сопствениците на „Магрива“.

Појаснуваат дека на јавен оглас зеле државно земјиште под концесија на кое има посадено 10 хектари ореви. Во 2010 година посадиле вкупен број прифатливи садници предвидени со упатството од Агенцијата за финансиска поддршка за подигање нов насад.

„Сакаме да кажеме дека сме регистрирале фирма со претежна дејност земјоделство и дека таа фирма навистина работи во интерес на развојот на земјоделството. Точно е дека ги користиме средствата од субвенции како што впрочем ги користат сите други земјоделци или земјоделски претпријатија. Двајцата сме дипломирани земјоделски инженери, а користиме и стручна помош. Сами можете да се уверите дека насадот постои и дека обвинувањата не се точни. Не знам како се случи да бидеме исполитизирани за некој да собира политички поени. Ние не сакаме политика, сакаме да работиме. Не' обвинуваат дека сме зеле 50.000 евра субвенции. Дека тоа не е точно може да се провери во банка“, рече Сашо Попов. (А.Д.)