07.09.2012, 15:40 Иванов првпат слуша за иницијатива за споменик на Талев во Прилеп
Македонија сака добри односи со Бугарија и се залага за надминување на разликите преку отворен дијалог. Претседателот Ѓорге Иванов првпат слуша за иницијативата што ја спомнал бугарскиот претседател Росен Плевнелиев за споменик на бугарскиот писател Димитар Талев во Прилеп, велат од кабинетот на Претседателот на Република Македонија во врска со последните изјави на неговиот бугарски колега за македонско-бугарските односи.
- Во однос на разликите за одредени прашања, Република Македонија опстојува на определбата за градење добрососедски односи и се залага низ отворен дијалог со Бугарија да се бараат решенија и да се надминуваат разликите кои влечат корени од минатото, стои во соопштението.
За наводите во бугарските медиуми дека Иванов се сретнал со Плевнелиев пред неколку дена во Брисел, од кабинетот посочуваат дека во Брисел немало средба на двајцата претседатели. Последната нивна средба, се додава, беше пред два месеца во Белград, на маргините на состанокот на Процесот за соработка во Југоисточна Европа, соопшти кабинетот на Иванов во однос на последните пишувања во бугарските медиуми.
Посочуваат и на одговорот на претседателот Иванов на заедничката прес-конференција со еврокомесарот за проширување Штефан Филе, од 4-ти овој месец, на прашање од новинар на бугарската национална телевизија „дали сте загрижени од одредени толкувања на македонски претставници дека заедничката историја со Бугарија може да наштети на вашето членство во ЕУ“.
- Европската унија е идеја која не обединува во иднината. Доста веќе гледавме назад. Ние пристапуваме кон Европската унија за со Бугарија да спроведуваме европски стандарди, критериуми и принципи. Да им ја оставиме историјата на историчарите, рекол Иванов.
Воедно, се потсетува дека шефот на македонската држава, од моментот на стапување на својата функција до денес, на сите средби со бугарските официјални претставници опстојува на овој искажан став во Брисел.
- Претседателот Иванов цени дека највисок приоритет на кој треба да се фокусираат двете земји се инфраструктурното, енергетското и меѓуграничното поврзување, на продлабочување и унапредување на економската соработка, стои во соопштението.
|
