СДСМ: Трајановски го фалсификува Урбанистичкиот план



„Укажуваме дека нацрт-верзијата за Генералниот урбанистички план на Скопје верификувана од советниците е единствената официјална верзија која смее да оди на стручна расправа и ревизија. Дури потоа, ако бидат прифатени забелешките од советниците, тој предлог може да стане официјална нова предлог-верзија. Вчерашната расправа околу просторното планирање беше обид градоначалникот Коце Трајановски да се испере од одговорноста за кршење на процедурите во носењето на ГУП-от“, рече координаторката на советничката група на СДСМ во Советот на Скопје, Софија Куновска.

Ова ново обвинување дојде само еден ден откако се одржа третата дискусија на градоначалниците и експертите околу предложениот ГУП и помалку од една недела откако опозициските советници обелоденија дека на јавноста и' е презентиран поинаков, лажен план. Тогаш беше речено дека е скратено и техничкото време за изработување на планот. Куновска сега повторно го обвинува Трајановски дека директно го прекршил законот кога наместо нацрт ГУП-от што беше усвоен од советниците на Град Скопје, поднел друга верзија до Агенцијата за просторно планирање, а сосема трета на стручната расправа. (Б.Ш.)

Градот ја негира надлежноста на Трајановски

Градските власти веднаш реагираа на изјавите на советничката Софија Куновска потенцирајќи дека Градот Скопје ја избрал државната Агенција за планирање на просторот за да го изработи новиот Генерален урбанистички план за 2012-2022 година. Тврдат дека комплетната надлежност за изработка на ГУП на Град Скопје ја има Агенција за планирање на просторот, а не градоначалникот Коце Трајановски.

„Градоначалникот Коце Трајановски во ниту еден момент не ги прекршил процедурите за изработка и донесување на Генералниот урбанистички план. Оттука Град Скопје ја повикува координаторката на советничката група на СДСМ во Советот на Град Скопје, Софија Куновска, да не ја залажува јавноста со погрешни информации“, соопштуваат од Градот. (Б.Ш.)