06.09.2012, 12:04 САД преголем залак за македонските шахисти
Пораз од 3-1 против петтиот носител на Олимпијадата, дамите ремизираа со Чиле
Петтиот фаворит САД ја прекина чудесната серија на 49-рангираната Македонија на јубилејната 40. Шаховска Олимпијада во Истанбул, совладувајќи го едно од најпријатните изненадувања на турнирот со 3-1 во осмото коло. Вториот пораз го спушти тимот селектиран од Драгољуб Јаќимовиќ од 12 на 22 место во конкуренција на 157 машки состави. Три кола до крајот македонскиот тим има 11 меч-бода, а можност за враќање во самиот врв на табелата беше синоќешниот дуел со Данска, која натпреварувањето го почна од 39. позиција според просечниот рејтинг на екипата.
Разликата во класи им овозможи на Американците да го одморат својот најдобар шахист, велемајсторот Хикару Накамура (2783), петти на листата на ФИДЕ. Но, и 14. играч во светот, ВМ Гата Камски (2746), беше соодветна замена на првата табла, на која го доби маратонот со црни фигури против ВМ Владимир Георгиев (2566), кој долго се обидуваше да спаси реми. Со празни раце остана и ВМ Трајко Недев (2494) на втората табла против ВМ Александар Онишчук (2666), кој порано настапуваше за Белорусија. Поразот го ублажија двете долни табли, на кои ремизираа ВМ Влатко Богдановски (2448) со ВМ Варужан Акобјан (2617) и интермајсторот Атанас Кизов (2418) со ВМ Реј Робсон (2598).
Женската селекција на Македонија, пак, ремизира 2-2 со Чиле, тим рангиран 13 места повисоко од тој на капитенот Ристе Менкиноски, кој почна како 68. Првиот нерешен резултат на Олимпијадата ни го донесе Моника Стојковска (1939) со победата со црни фигури на третата табла против Емилија Ларачеа (2061), која е мажена и живее во Неготино. Претходно, на горните табли поенот го поделија ЖИМ Габриела Коскоска (2094) со Дамарис Абарка (2024) и Бојана Бејатовиќ (1978) со ЖФМ Марија Хосе Торо (2040), а на последната Симона Лакинска (1655) загуби од Паула Рејес (2115). Пред синоќешниот дуел со аутсајдерот Нигерија дамите со седум меч-бода беа 79. меѓу 127 тима.
Резултати од осмото коло, мажи: Русија (1. по рејтинг) - Украина (2.) 2,5-1,5; Кина (6.) - Азербејџан (7.) 2-2; Ерменија (3.) - Узбекистан (33.) 3-1; Македонија (49.) - САД (5.) 1-3; Германија (14.) - Унгарија (4.) 2,5-1,5; Англија (11.) - Филипини (35.) 1-3; Франција (8.) - Куба (15.) 2,5-1,5; Индија (13.) - Србија (20.) 2-2; Шпанија (18.) - Израел (12.) 0,5-3,5; Летонија (30.) - Холандија (9.) 1-3 итн.
Табела: Русија 15 меч-бода, Кина, Ерменија, САД, Германија и Филипини по 13, Азербејџан, Украина, Холандија, Франција, Израел, Аргентина и Полска по 12 итн. (Р.Д.)
|
