05.09.2012, 12:15 Македонските шахисти блескаат на Олимпијадата
Македонија ја совлада и Италија со 2,5-1,5 и се искачи на делба на четвртото место
Извонредната серија на машката шаховска репрезентација на Македонија продолжи и во седмиот круг на јубилејната 40. Олимпијада во Истанбул, во кој пред нејзиниот налет капитулира и фаворизираната Италија. Македонија, која го почна турнирот од 49. позиција според рејтингот, славеше со 2,5-1,5 над тимот рангиран 27 места повисоко и се искачи на делба на четвртото место во конкуренција на 158 машки состави. Според Бухолц, пак, избраниците на капитенот Драгољуб Јаќимовиќ беа 12. пред синоќешниот дуел со петтиот носител САД.
Големата победа над Италија ја донесоа велемајсторот Трајко Недев (рејтинг 2494) и интермајсторот Атанас Кизов (2418), обајцата искористувајќи ги белите фигури - првиот против ВМ Микеле Годена (2516) на втората табла, а вториот во дуелот со ИМ Данил Двирни (2520) на последната. ИМ Филип Панчевски (2461) на третата ремизира со ВМ Даниеле Вокатуро (2542), а ВМ Владимир Георгиев (2566) на првата изгуби од ВМ Фабијано Каруана (2773), осми на рејтинг-листата на ФИДЕ.
За разлика од мажите, женската селекција на Македонија претрпе максимален пораз од 4-0 против Венецуела, која турнирот го почна од 53. место, а тимот селектиран од Ристе Менкиноски од 68. Ништо не навестуваше катастрофа, бидејќи ЖИМ Габриела Коскоска (2094) имаше добиена позиција со бели на првата табла против ИМ Сараи Санчез (2193), но подари топ, а реми в џеб имаа Бојана Бејатовиќ (1978) против Леонела Гутиерез (2067) и Драгана Николовска (1828) против Заида Ернандез (1990), но киксираа. Загуби и Моника Стојковска (1939) од Хорсерис Монтилја (2050), па со шест меч-бода Македонија е 75. меѓу 124 женски екипи.
Резултати од седмото коло, мажи: Азербејџан (7. по рејтинг) - Русија (1.) 1,5-2,5; Кина (6.) - Ерменија (3.) 2,5-1,5; Филипини (35.) - Унгарија (4.) 2-2; Украина (2.) - Шпанија (18.) 2,5-1,5; Молдавија (23.) - Германија (14.) 1,5-2,5; Аргентина (29.) - Индија (13.) 2-2; САД (5.) - Турција (31.) 3,5-0,5; Израел (12.) - Франција (8.) 2-2; Грузија (26.) - Англија (11.) 1,5-2,5; Мексико (38.) - Узбекистан (33.) 1-3 итн.
Табела: Русија 13 меч-бода, Кина и Украина по 12, Ерменија, САД, Унгарија, Азербејџан, Германија, Узбекистан, Филипини, Англија и Македонија по 11 итн. (Р.Д.)
|
