(ФОТО) Македонија ги почна подготовките за Хрватска и Шкотска

На првиот попладневен тренинг на „Филип Втори“, новиот селектор Јаневски ги имаше на располагање сите повикани фудбалери со исклучок на Тодоровски и Тасевски

ФОТО: Петр Стојановски

Македонската фудбалска репрезентација денеска ги почна подготовките за двата квалификациски натпревари за СП против Хрватска (7. септември) и Шкотска (11. септември) на гостински терен.

На првиот попладневен тренинг на „Филип Втори“, новиот селектор Чедомир Јаневски ги имаше на располагање сите повикани фудбалери со исклучок на повредениот Александар Тодоровски, кој отпадна од комбинација, како и Дарко Тасевски кој поради мали проблеми со обезбедување на визата за Шкотска во текот на утрешниот ден ќе и се приклучи на репрезентацијата.

„Почнуваме еден нов квалификациски циклус од кој сите веруваме ќе извлечеме еден голем плус за македонскиот репрезентативен фудбал. Овие денови ни останува добро да се подготвиме за првите два натпревари во квалификациската група, убедени дека може максимално да се надигруваме со противниците. Секој селектор сака на располагање да ги има сите повикани фудбалери, но ние ќе мора да се соочиме со одредени откажувања“ – рече денеска Јаневски, кој во последен момент се одлучи во селекцијата да повика двајца фудбалери од домашната сцена, Остоја Стјепановиќ и Драган Ѓоргиев од Вардар.

Утре, националниот тим ќе одработи два тренинга, првиот од 10 часот на арената „Филип Втори", попладневниот од 18 часот.

УЕФА ги одреди судиите за првиот квалификациски натпревар на нашата селекција против Хрватска. Израелецот Алон Јефет ќе биде главен судија на дуелот на "Максимир", а негови помошници ќе бидат сонародниците Амихај Јехошуа Мозес и Абет Ал Ремили.