05.09.2012, 14:34 Уште една шанса за загубарите
Фирмите-загубари ќе добијат уште една шанса да се продадат. До крајот на месецов, како што најави министерот за економија, Ваљон Сарачини, ќе бидат објавени тендери за продажба на загубарите ОХИС, Тутунски комбинат - Прилеп и „Еурокомпозит“ - Прилеп. Јавниот повик за продажба на ЕМО Охрид ќе биде објавен подоцна.
„На тендерот за продажба на ОХИС остануваат истите критериуми и не е сменет моделот. Потребно е само следната недела на седница на Владата да се спроведат процедурите околу објава на новиот тендер и официјално да добиеме одобрение за објавување јавен повик“, изјави Сарачини, одговарајќи на новинарско прашање пред почетокот на вчерашната презентација на ЦИП - Програма за конкурентност во Стопанската комора на северозападна Македонија. Тој нагласи дека веќе се завршени сите неопходни процедури во Министерството за економија и во ПИОМ.
Ова е деветти тендер за продажба на ОХИС, со што и натаму продолжува агонијата на 800 вработени. Тие се децидни во барањата да се исплатат заостанатите плати и сините картони и да се вратат на работа.
Досегашните бизнис-планови на раководството со кои компанијата би станала профитабилна не поминаа кај Владата. ОХИС лани пријавил загуба од 13,9 милион евра.
|
