Инвестицискиот самит за посилна економија 

„Македонија 2025“ ги повика македонските извозни компании на Самитот во Охрид да ги проверат можностите за соработка со нашата бизнис дијаспора

Организацијата „Македонија 2025“ преку глобален инвестициски самит закажан за во Охрид ќе ја зајакнува соработката меѓу бизнис заедницата од Македонија и дијаспората. Мотото на Самитот, што ќе се одржи од 18 до 21 октомври во Охрид, е „Нови можности: Преку бизнис дијаспората до зголемена трговија, инвестиции и економски раст“.

Од Организацијата денеска најавија дека Самитот во Охрид ќе биде еден од најголемите настани годинава на кој ќе присуствуваат над 40 панелисти, истакнати стручеаци и професионалци од сферата на економијата. Целта е да се зајакне соработка меѓу домашните и нашите бизнисмени од целиот свет.

„Ќе бидат претставени можностите за инвестирање во Македонија, како и потенцијалите за извоз, успешни бизнис модели кои веќе се тестирани и испробани со цел да мотивираат слични потфати и во иднина“, изјави Зоран Мартиновски, член на одборот на директори на „Македонија 2025“ и претседател на Глобалниот инвестициски самит. Тој ги повика македонските извозни компании на Самитот во Охрид да ги проверат можностите за соработка со нашата бизнис дијаспора.

Директорот на „Алкалоид“, Живко Мукаетов, како член на одборот на директори на „Македонија 2025“, потенцира дека Македонија има одлични производи и брендови, кои треба да се етаблираат на странските пазари со помош на партнери.

„ Преку размена на знаења, технологии,сакаме да изградиме мост меѓу домашниот бизнис сектор и македонските бизнисмени кои се дел од големите светски корпорации. Увоз на знаење ни треба во секој случај, а нови технолигии особено се неопходни во агросекторот, таму има простор за подобрување и на квалитетот и на начинот на продажба“, истакна Мукаетов.

Според Минчо Јорданов, директор на „Макстил“ и исто така член на одборот на директори на „Македонија 2025“, Самитот особено е значаен во овие услови на криза за да се зацврсти соработката.

Тој смета дека потребен е отворен дијалог за бизнис климата и со дијаспората. „За да имаме странски инвестиции треба да бидат запознати луѓето да разберат за нас. Многу малку сме афирмирани. Пред се треба да ги понудиме оние можности преку кои ќе прават профит компаниите“, изјави Јорданов. (С.М.)