Во Македонија нема заболени од западно-нилска треска

Комисијата за заштита на населението од заразни заболувања на денешната работна средба ја разгледа состојбата со заразни заболувања во државата, при што е констатирано дека нема поголеми отстапувања во бројот на заразни заболувања, карактеристични за летниот период.

Посебно внимание беше посветено на информациите за ширење на вирусот на западно-нилска треска во околните земји (Србија и Грција), при што беше заклучено дека во Република Македонија досега нема лабораториски потврдено случај на заболен од западно-нилска треска.

На средбата беше констатирано дека постои голем напредок од минатата година во однос на бројот на општини кои ја реализираа законската обврска за дезинсекција и дератизација и оти успешно се реализира Акцискиот план против вектор-преносливи болести.

Поголемиот дел од општините веќе имаат преземено активности за теристичко или авионско прскање, како најдобра превентивна мерка за уништување на комарци.

На територијата на Скопје деновиве се врши четврто ларвицидно прскање против комарци, со посебен акцент на водните површини, по течението на реката Вардар и езерото Треска. Акции за прскање неколкупати летово се преземени и во речиси сите поголеми градови низ државата.

Од Институтот за јавно здравје информираа дека имаат обезбедено доволен број тестови за дијагностика на пациенти сомнителни за западно-нилска треска и дека годинава се испитани материјали од 25 сомнителни лица, но кај сите резултатите се негативни.

Остануваат на сила препораките за преземање превентивни мерки за заштита од вектор-преносливи болести, кои се пренесуваат преку комарци, односно поставување заштитни мрежи на врати и прозорци, отстранување застоена вода од дворови (буриња, вирови, шахти и стари гуми во кои може да се собира дождовницата) и редовно чистење на олуците за да се овозможи истекување на водата и употреба на средства за заштита од каснување комарци.

Најчесто болеста поминува полесно без симптоми, а кај оние кај кои ќе се јават симптоми, тие се слични на грип-покачена температура, изнемоштеност, болки по телото, може да се јават и гадење, повраќање и испип по телото.

Овие симптоми може да бидат резултат и на други респираторни заболувања и од Комисијата препорачуваат доколку се почувствува дел од сиптомите, а лицето има сознание дека е каснат од комарец, пожелно е да се консултира со матичниот лекар.