Бесими: Немаше прекршување на процедурите во Слупчане



Министерот на одбрана денеска на средба со новинарите го образложи контроверзниот настан

ФОТО: Киро Попов

„Јас не се амнестирам, но мојот став го кажав во однос на настанот во Слупчане и мислам дека поентата од целиот случај е дека ние меѓусебе треба да се почитуваме и да сфатиме дека живееме во иста куќа и имаме заедничка иднина.

Вака министерот за одбрана Фатмир Бесими денеска на средба со новинарите по нивно барање го образложи настанот во Слупчане.

„Длабоко верувам во тоа што го кажувам. Долго време сум во државни институции и досега не сум имал ниту една изјава етнички базирана“, рече Бесими, додавајќи оти дневнополитички можеби тоа звучи идеализирано, но тоа е Македонија, потенцира, во која верува и во која може да успееме.

Министерот за одбрана повторно изјави немало прекршување на процедурите при неговото поклонување пред споменикот во Слупчане и дека униформираните лица во неговата придружба во селото биле по негова наредба и поради тоа не била прекршена никаква процедура.

„Клучот на сe е дека ние треба меѓу нас да се почитуваме и да сфатиме дека живееме во иста куќа и имаме заедничка иднина. Тоа е клучот. Ако така постапуваме, мислам дека има решенија за сe. Македонија заслужува да биде дел од евроатлантските структури, евроатлантската заедница, како што го дава својот придонес, а тоа можеме доколку ние меѓу нас ги надминуваме разликите, треба заеднички да работиме и да гледаме како идните генерации да имаат посветла иднина и тоа ние можеме да го постигнеме ако се обидеме да се разбереме меѓу себе“, рече Бесими.

На прашањето каде се разидуваат со заменик-министерот за одбрана Емил Димитриев кој соопшти дека ќе се покренат дисциплински постапки, Бесими одговори дека во сите изјави и соопштенија се презентира ставот на Министерството, а не се коментира.

Во врска со законот за бранителите, Бесими истакна дека ДУИ и пратеничката група имаат изградено и презентирано политички став и нема ништо повеќе да додаде.

На новинарско прашање за приемот на 12 припадници од етничките заедници кадети во Воената академија, кои се многу подолу на ранг листата со освоени поени врз основа на дадените критериуми, министерот за одбрана појасни дека изборот е направен согласно Законот за воена академија, а во конкретниот случај досега нема пристигнато жалби за одлуката за направениот прием. Во однос на процедурата, подвлече, се предвидува, покрај квалитетот да се има предвид и правичната застапеност.

- На ниво на АРМ на офицерски позиции има околу 10 проценти од етничките заедници во Република Македонија, а тој процент е повисок кај професионалните војници. Значи станува збор за имплементација на законски одредби, рече Бесими, информрајќи оти меѓу 12 - те примени има и Турчин, Бошњак и Албанци.