Стогодишник се` уште работи во „Волмарт“

Највозрасниот работник во САД има 100 години и веќе 29 години работи во супермаркет на „Волмарт“ во Канзас

Највозраснотo вработено лице во САД е 100-годишниот Лорен Вејд, кој веќе 29 години работи во продавница од синџирот супермаркети „Волмарт“ во градот Винфилд, во државата Канзас.

Тој воглавно работи зад пултот за храна за животни, но може да стои и на касата и да ги советува клиентите за изборот на производите.

На ова работно место Лорен почнал во 1983 година, а сега добива по 14 долари на час и работи по 30 часа или пет дена во неделата.

Пензијата на Лорeн, инаку, му изнесува 1.700 долари месечно, но со дополнителните пари, тој може, на пример, да ја изведе својата 83-годишна сопруга во ресторан и да си дозволи други екстра погодности.

Лорeн неодамна ја доби наградата за најпримерен работник за 2012 година од американската асоцијација „Експириенс ворк“, која го поттикнува вработувањето кај возрасните луѓе.

Пред да стане продавач Лорен бил вработен во компанијата Форд, имал продавница за макети, работел во расадник и бил вработен во системот за железнички транспорт.

Тој годишно има право на четири недели одмор, кога свири на саксофон и ја средува својата градина.

Во САД во 2010 година беа регистрирани 53.000 стогодишници.

Според податоците на Меѓународното биро на труд, 1,25 милиона лица на возраст над 75 години се` уште работат во САД.