Талат Џафери урива рекорди во молчење



Откако пратеникот на ДУИ, Талат Џафери, денеска на Комисијата за труд и социјална политика добил збор од претседателката Цветанка Иванова решил да молчи еден час. Тој, како што пренесува порталот „Плусинфо“, изјавил дека ако некој го прекине во молчењето, ќе побара повторно збор и ќе молчи уште 60 минути, се додека не го срушел рекордот, кој во претходните расправи го постигна со зборување.

На Комисијата единствена точка е предлог на Законот за бранителите, а претседателката Иванова рекла дека пратеникот има право на таква постапка, но апелирала дека треба да биде фер и да се однесува сериозно кон Комисијата.

Претседателката на комисијата Иванова вчера најави дека за да се заокружи комисиската расправа за овој Закон пред тој да дојде пред пратениците на собраниската седница на која е 31 точка на дневниот ред, комисијата ќе работи и по 18 часот а расправата ќе продолжи и утре, иако е викенд.