15.09.2012, 17:17 Владата го усвои Законот за граѓанска одговорност за навреда и клевета
Владата ги усвои Законот за граѓанска одговорност за навреда и клевета и Законот за изменување и дополнување на Кривичниот закон со што влегува во кругот на држави кои ја имаат декриминализирано навредата и клеветата.
Законските решенија, информираат од Владата, се усвоени на вчерашната владина седница.
Оттаму истакнуваат дека на овој проект се работело подолг временски период и во изготвувањето на законските решенија биле вклучени Здружението на новинари, претставници од науката, судии и јавни обвинители. Основа за изготвувањето на двата наведени закона била компаративната анализа во оваа област и меѓународнте стандарди кои се целосно вградени во конкретните законски решенија.
Може да се констатира дека Република Македонија со донесувањето на овие закони ќе биде една од ретките држави која во законските решенија има инкорпорирано стандарди повисоки и од оние кои се содржани во меѓународните документи. Тука пред се се мисли на Документот 11305 од 25 јуни 2007 година на Парламентарното собрание на Советот на Европа насловен како „Кон декриминализација на клеветата“, изготвен од Комитетот за правни прашања и човекови права и на Препораката на Комитетот на министри Рец (2004) 16 за правото на одговор во новата медиумска средина. Исто така, при изготвувањето на конкретните законски решенија во целост е земена предвид и богатата јурисподенција на Европскиот суд за човекови права која се однесува на членот 10 од Европката конвенција за човекови права, велат владини извори.
Со измените и дополонувањата на Кривичниот законик се бришат сите кривични дела од главата која се однесува на честа и угледот. Со тоа, се јакне слободата на изразување и на медиумите воопшто. Покрај кривичните дела „Навреда“ и „Клевета“, кои претставуваат клучни дела, од оваа глава се бришат и останатите кривични дела кои се однесуваат на: Изнесување на лични и семејни прилики, Омаловажување со префрлање за кривично дело, Повреда на угледот на Република Македонија, Излагање на подбив на македонскиот народ и припадниците на заедниците, Повреда на угледот на судот, Повреда на угледот на странска држава и Повреда на угледот на меѓународна организација.
Со бришењето на наведените кривични дела од Кривичниот законик се востановува единствено граѓанска одговорност за навреда и клевета. Оваа материја е уредена во новиот Закон за граѓанска одговорност за навреда и клевета. Со законот се воведува нов концепт на одговорност за навреда и клевета, усогласен со препораките на Европската унија, Советот на Европа, како и најновите тенденции во европските законодавства, во контекст на јакнење на слободата на јавно изразување на мислата и определувањето, слободата на медиумите. Притоа, негова основна цел е да ја гарантира слободата на изразување и информирање како една од битните основи на демократското општество.
|
