14.09.2012, 14:26 Скопјани на 23. септември ќе појадуваат на Камениот мост
Манифестацијата „Појадок на мост 2012“ годинава ќе се одржи на 23 септември на Камениот мост. Организатор е Град Скопје, Секторот за Локален економски развој на Град Скопје и Средното угостителско училиште „Лазар Танев“.
„Целта на ’Појадокот на мост‘, пред се', е граѓаните на Скопје да се дружат на еден поинаков начин. Самиот факт дека манифестацијата се одржува трет пат, е показател дека таа преминува во традиција и станува белег на градот. Град Скопје ги повикува сите заинтересирани граѓани да си обезбедат влезница навреме, зашто без влезница нема да можат да добијат место на масите што ќе бидат поставени на мостот и нема да можат да добијат пакети со појадок“, рече на вчерашната прес-конференција градоначалникот Коце Трајановски.
Поради специфичноста и ограниченоста на просторот бројот на влезници е ограничен на околу 2.000. И оваа година влезниците се бесплатни. Граѓаните кои се заинтересирани да си обезбедат влезници ќе треба да се пријават на пунктот поставен пред кафеаната „Пелистер“. Притоа треба да имаат со себе лична карта или друг документ за лична идентификација, за што се добива еден купон. Пријавување ќе се врши од денеска до четврток, во период од 10 до 15 часот.
Камениот мост ќе биде затворен за пешаци од саботата 22 септември во 19 часот до 15 часот во недела, на денот на одржување на манифестацијата.
Реализатор на проектот е СУГС „Лазар Танев“, а храната ќе биде однапред подготвена во специјални кутии. Дел од донаторите на манифестацијата се „Тинекс“, Пиварница „Скопје“, „Здравје Радово“, месарници „Римес“, пекарница „Специјал“, „Винчини“, месарници „Жива“, Занаетчиска комора, „Жито-лукс“, „Жито леб“, Градска кафеана „Пелистер“ и ресторан „Кај Џино“. (С.Р.)
|
