Вардар про лесно со Мешков Брест

Бранителот на трофејот во регионалната ракометна СЕХА-лига, Вардар про, во СРЦ „Кале“ го совлада белорускиот дебитант Мешков Брест со 34:27

Уверлив старт на бранителот на трофејот во регионалната ракометна СЕХА-лига, Вардар про, кој во СРЦ „Кале“ го совлада белорускиот дебитант Мешков Брест со 34:27. Уште на полувремето, на кое црвено-црните заминаа со предност од 16:9, беше јасно дека бодовите ќе останат во Скопје. Гостите во почетокот од вториот дел намалија на 17:13, но по тајм-аутот на Веселин Вујовиќ неговиот тим повторно ја презеде контролата врз играта и врз резултатот и р��тински ја приведе средбата до крајот. На голот своја вечер имаше Мартиновиќ, кој скроти шест противнички удари во низа, а во нападот се издвоија Раковиќ и Марковиќ со по пет гола.

Финалистот Металург не замина на гостувањето во Словачка за да му излезе на мегдан на Татран во Прешов поради проблеми со организацијата на патувањето.

Резултати од првото коло: Борац – Нексе 19:20, Вардар про – Мешков Брест 34:27, Кроација осигурање - Слога 35:17, Извиѓач – Ловќен 31:27, Татран – Металург одложено.

Следно коло (22 септември): Слога – Нексе, Кроација осигурање – Вардар про, Мешков Брест – Извиѓач, Металург – Борац и Ловќен – Татран. (Р.Д.)

Вардар про – Мешков Брест 34:27

Полувреме: 16:9. Сала: СРЦ „Кале“ во Скопје. Гледачи: 1.100. Судии: Митровиќ и Весовиќ од Црна Гора.

Вардар про: Мартиновиќ, Милиќ, Ојлески 1, Маркоски 1, Стоилов 3, Недановски 2, Прибак 3, Кукоски, Раковиќ 5, Петриќ 3, Јовчевски 1, Марковиќ 5, Лазаров 2, Карачиќ 3, Рајковиќ 2, Абутовиќ 3.

Мешков Брест: Божиќ, Ѓукиќ 3, Калјасну 1, Атајебс 3, Чанчар, Шќепановиќ 2, Пракапенја 4, Чарапенка, Шимак 2, Вукиќ 3, Баранау 2, Гросас, Карачиќ 3, Татарин 4, Ушал, Громико.