13.09.2012, 16:10 Арсенал сака да го задржи Венгер
Иако седум години немаат трофеј со Французинот на клупата, „топчиите“ се задоволни од неговата работа
Арсенал планира да го задржи тренерот Арсен Венгер уште долго време, бидејќи верува во неговиот начин на работа и покрај тоа што клубот нема освоено ниту еден трофеј во последните седум години. Извршниот директор на лондонскиот клуб Иван Газидис откри дека планира да го продолжи договорот на францускиот стручњак и по 2014 година. Јужноафриканскиот бизнисмен вели дека клубот под негово водство се движи во вистинска насока.
„Нов договор кој ќе му го понудиме на Арсен Венгер не е поради сентименталност, ниту претставува награда за досегашната работа. Ние имаме доверба во него, а Французинот е неверојатен тренер кој е исклучително посветен на клубот и кој е вистинскиот човек кој ќе го води Арсенал во нови предизвици“, изјави Газидис.
Венгер е задоволен што челниците имаат комплетна доверба во него и разбирање на неговиот начин на работа, меѓутоа нема да брза да го потпише новиот договор кој го најави Газидис. 62-годишниот тренер е целосно посветен на работата на тимот, а за преговорите ќе размислува кога ќе дојде време за тоа.
„Имам уште две години. Многу ми е поважно како ќе игра тимот во новата сезона отколку новиот договор. Јас сум човек на Арсенал и мислам дека до сега тоа сите го знаат. Долго сум во клубот и стекнав доверба кај луѓето со кои работам, меѓутоа прво ќе ги оценам сопствените перформанси и тогаш ќе одлучам. Сега ми е рано да се занимавам со новиот договор“, изјави Венгер, кој во Арсенал работи од 1996 година.
Французинот му донесе на Арсенал вкупно 11 трофеи, од кои три во Премиер-лигата. Последниот беше во 2005 година од ФА-купот.
|
