Филмот на Киро Урдин со престижна награда во Кина

Македонскиот филм „Две времиња“ е сниман на локација во Кенија и Танзанија во пределот на Масаи Мара

Македонскиот филм „Две времиња“ на македонскиот уметник Киро Урдин ја освои престижната награда „Најдобар филм од областа на природното окружување“ на овогодишниот филмски фестивал во Кина „China Ya'an International Animal и Nature Film Festival“. На овој фестивал учествуваат најголемите светски филмски и телевизиски продукции од светот на филмови и емисии од областа на екологијата, животинскиот свет и природата.

Филмот на Урдин ја освоил наградата во конкуренција на најсилните продукции од 40 земји од светот во оваа област како каналот Дискавери, Би-Би-Си, Анимал планет итн. Фестивалот традиционално се одржува во Yi-Ha, земјата на пандите. На свеченото затворање и доделување на наградите бил поканет и нашиот амбасадор во Кина, Оливер Шамбовски.

Инаку, во „Две времиња“ за камерата е задолжен Бранд Феро, монтажата е на Владимир Петровски-Картер, музиката е на Венко Серафимов, а сценариото исто така е на Киро Урдин. Филмот е сниман на локација во Кенија и Танзанија во пределот на Масаи Мара.