Маџиров ја доби стипендијата „Маргерит Јурсенар“

Стипендијата се доделува исклучиво на европски автори, кои имаат издадено дело во некоја европска издавачка куќа и објави на француски јазик

Македонскиот поет Никола Маџиров ја доби значајната европска книжевна стипендија „Маргерит Јурсенар“ за 2013 година, под покровителство на Генералниот Совет на Северниот дел на Франција.

Стипендијата се доделува исклучиво на европски автори - романсиери, поети, раскажувачи, драматурзи - кои имаат издадено дело во некоја европска издавачка куќа и објави на француски јазик.

Во конкуренција на повеќе од стотина кандидати, независното жири составено од познати европски книжевници го избра Никола Маџиров како единствен балкански и прв македонски автор меѓу петнаесетте европски книжевници-лауреати за 2013 година.

Стипендијата вклучува и едномесечен книжевен престој во Вилата „Маргерит Јурсенар“, лоцирана на имотот на семејството Јурсенар во северниот дел на Франција, каде што творела и светски признатата француска авторка Маргерит Јурсенар (1903-1987). Маџиров ќе патува на имотот на Јурсенар од 8-ми до 10-ти ноември 2012 година, каде што пред европската јавност ќе бидат претставени преку читања и разговори сите петнаесет селектирани автори.