10.09.2012, 15:21 Ѓоковиќ и Мареј во вечерашното финале
По негативата Србинот успеа да се врати и да триумфира во одложениот полуфинален меч против Ферер
Шпанците имаа една ноќ за илузии дека, можеби, Давид Ферер е дораснат да се справи со Новак Ѓоковиќ на еден гренслем-турнир, меѓутоа вистината им удри шлаканица. Вториот тенисер на светот го совлада Ферер со 2-6, 6-1, 6-4, 6-2, иако на почетокот пред да биде пролонгирано во саботната бура, губеше со 5-2. Шпанецот ја реализира оваа предност во вчерашното продолжение и поведе со 6-2 во првиот сет, но повеќе не можеше. Ѓоковиќ покажа дека во нормални услови е за класа подобар од Ферер, барем на бетонот во Њујорк. Вториот сет го освои со 6-1, а во третиот го одби последниот значаен напад на Ферер и направи целосен пресврт во резултатот. Иако Ферер важи за, можеби, најборбениот тенисер на планетата, немаше многу средства за да возврати рамноправно ниту во четвртиот период и загуби со 6-2.
Клучот за победата беше изострениот нишан на сервисот, но како и секогаш високиот процент на поени кога противникот прв го удира топчето. Ферер придонесе со сопствениот лош прв сервис, а не му успеа стратегијата да го истроши бекхендот на Ѓоковиќ инсистирајќи на таа страна, иако Србинот најголемиот број грешки ги направи на тој начин. Сепак, удел во статистиката има и првиот сет, од саботата, што се играше во услови на пресилен ветар.
„Изгледа имав среќа што не прекинаа. Се молев да нема ветар повторно. Тој подобро се снајде во тие услови, но еве денеска имаше многу поинаква ситуација“, изјави Ѓоковиќ откако се пласира во своето трето едноподруго финале на УС опен, четврто вкупно. За да ја повтори титулата од минатата година ќе мора против Енди Мареј.
„Кога е во прашање финалето нема прав фаворит, знаеме дека ќе биде изедначено и дека ќе одиграме одличен тенис“, додаде Ѓоковиќ.
|
