Талевски и вети нова стрелачка сала на Наковска-Бикова



Параолимписката шампионка и светска рекордерка за следните Игри во Рио де Жанеиро ќе тренира во новоопремен објект за стрелаштво

БИТОЛА - Македонската „златна“ стрелачка Оливера Наковска-Бикова за следните Параолимписки игри во Рио де Жанеиро ќе тренира во новоопремена спортска стрелачка сала во Битола. Ветувањето за подобри и попристојни услови за стрелање македонската параолимпијка го доби денеска лично од градоначалникот Владимир Талевски.

Битолчанката Наковска-Бикова, која го освои златниот медал во дисциплината воздушен пиштол 10 метри на Параолимписките игри во Лондон, вели дека нејзиниот успех се должи на долгогодишна и макотрпна работа, секојдневни тренинзи и одрекување од приватниот живот, а не на обезбедени пристојни услови за занимавање со овој спорт.

„Тренирам во минимални услови во спортска сала во Центарот за социјални работи во Битола. Од градоначалникот добив ветување дека во иднина ќе се вложат напори за да се направи стрелиште. Зашто Параолимписките игри во Рио се ближат“, рече Наковска-Бикова на средбата со Талевски во битолската Општина.

Олимпијката вели дека многумина и' помогнале во изминатата година додека се подготвувала за Игрите во Лондон.

„Работам во ’Фустеларко Борец‘ во Битола и од Нова година сум отсутна од работа, ме ослободија за да можам да се подготвувам за спортските игри. Многу сум им благодарна. Јас се посветив на спортот и нема откажување“, вели македонската стрелачка.

Битолскиот градоначалник Талевски најави дека за скоро време ќе опреми тренинг-простор вклучително и опрема за потребите на битолската параолимпијка.

„Ова што го постигна Оливера ќе биде запишано со златни букви во историјата на Битола. Има луѓе кои секогаш ги надминуваат проблемите. Оливера покажа дека и во такви услови може да се добие златен медал. Но, бидејќи навистина работат во тешки услови, се договоривме со целата екипа да одберат место и простор во кој ние ќе вложиме. Сакаме Оливера да биде максимално подготвена до 2016 за Олимписките игри во Бразил“ рече Талевски.

Наковска-Бикова вчера заедно со своите колеги Бранимир Јовановски и Ванчо Каранфиловски како и со преостанатиот дел од тимот беа свечено пречекани во битолската Општина. Од градоначалникот Талевски, Наковска- Бикова доби подарок грбот на Општина Битола и икона од заштитникот на градот св. Нектариј Битолски.

Нејзиниот тренер Јовановски вели дека за да се постигне успехот на Оливера не може само да се ��еме дете од улица и да се доведе во спортски клуб и да постигне високи резултати. Токму затоа најави дека Наковска-Бикова нема пречки да учествува и на Олимписки игри.

„Успехот на Оливера е плод на 15 години макотрпна работа. Таа тренира 11 месеци во годината, пет дена во неделата, со минимум четири часа днев��н тренинг. Таа ќе биде сериозен кандидат за состав на македонската репрезентација за Олимписките игри во Рио во 2016 година“, рече Јовановски. 

Вечерва на плоштадот во Битола ќе се одржи музички настан насловен „Добредојде за Оливера“. (А.Б.)