17.09.2012, 13:56 Чешка трет пат финалист во Дејвис купот
Прекината 14-годишната победничка низа на Аргентина на домашен терен
Хуан Мартин дел Потро ја остави Аргентина без вистинско решение во полуфиналниот меч од Дејвис купот против Чешка, која го искористи повлекувањето на првиот рекет на „гаучосите“, изборувајќи го своето трето, второ од осамостојувањето на земјата. Дел Потро го откажа вчерашниот настап поради повредата на зглобот на левата рака, а неговата замена Карлос Берлок не беше ни одблиску достоен противник за шестиот тенисер на планетата Томаш Бердих. Тој триумфира со 6:3, 6:3, 6:4 и и' донесе недостижно водство на Чешка од 3:1. Покр��ј големиот успех, Чесите имаа сатисфакција и во тоа што ја прекинаа серијата на домашни победи на Аргентинците долга 14 години.
„За мене ова е врв во кариерата. Едвај чекам да дојде финалето и да дадеме се' од себе. Малку се нештата што можат да го надминат ова чувство. Да освоите три поени во три дена, и тоа на ова место. Аргентинците имаа 14-годишна серија победи и токму ние сме тие што ја прекинавме“, изјави Бердих.
Почетокот беше идеален за Аргентинците, кои во петокот многу емотивно ја поздравија победата на повредениот Дел Потро од 6:4, 6:4, 6:2 против Радек Штепанек. Но, до крајот на денот Бердих возврати со тежок триумф од 6:1, 4:6, 1:6, 6:4, 6:4 над Хуан Монако. Во дуелот во двојки Чесите направија вистински потег што ги ставија искусните Бердих и Штепанек како замени за Минар и Росол, бидејќи тие лесно се справија со „втората постава“ на домаќините Берлок и Шванк, совладувајќи ги со 6:3, 6:4, 6:3.
Чесите имаат еден триумф во Дејвис купот, а во битката за втората „салатара“ ќе ја имаат поддршката и на домашната публика.
Швајцарија го слави Федерер
Роже Федерер го совлада Робин Хасе со 6:1, 6:4, 6:4 за вкупна победа на Швајцарија од 3:2 над Холандија и за влез во Светската група на Дејвис купот. Светскиот рекет број еден немаше проблеми против 50-рангираниот Хасе на земјениот терен во Амстердам, по што Тимо де Бакер го совлада Станислас Вавринка со 6:2, 7:6 (4) за утешен минимален пораз.
Плејоф за Светската група: Казахстан - Узбекистан 3:1, Германија - Австралија 3:2, Јапонија - Израел 2:3, Белгија - Шведска 5:0, Канада - Јужна Африка 2:1, Бразил - Русија 3:0, Италија - Чиле 4:1, Холандија - Швајцарија 2:3.
|
