Спорот меѓу Бугарија и Македонија заглави во „Трето полувреме"

Европската комисија нема да зазема страна во споровите меѓу Бугарија и Македонија и сака тие да бидат решени преку билатерален дијалог

Европската комисија нема да зазема страна во споровите меѓу Бугарија и Македонија за културно-историското наследство и сака тие да бидат решени преку билатерален дијалог, изјавил Петер Стано, портпаролот на еврокомесарот за проширување Штефан Филе.

Стано за Бугарското национално радио ги коментирал односите Софија - Скопје, конкретно во врска со филмот „Трето полувреме", кој според бугарските политичари и историчари ги искривувал фактите од Втората светска војна и поттикнувал омраза кон Бугарија.

- Ние нема да ги коментираме чувствата или интерпретациите на која и да било од страните. Ако тој филм поставува прашања, ако допира чувствителни теми и ако создава проблеми во односите меѓу двете земји, тогаш тие треба да ги разгледаат тие проблеми и да ги надминат. Во овој случај говориме за филм кој обработува настани од Втората светска војна и препорачливо е историчарите да водат дебати за него. Не е работа на Европската комисија да суди или да кажува чии интерпретации се точни, а чии грешни. Ако филмот биде оценет од критиката, од експертите и од историчарите како проблематичен, ако создава проблеми меѓу Бугарија и Македонија, првото што треба да се направи е двете страни заедно да побараат решение, изјавил Стано.

Портпаролот на Филе, како што пренесуваат бугарските медиуми, рекол дека ако евентуална правна експертиза докажела дека филмот е проблематичен, засегнатата страна може да преземе соодветни правни мерки и тогаш Европската комисија би можела да ја преземе улогата на контролор на европските договори.