18.09.2012, 14:31 Џафери го прекина молкот поради Филе
Пратеникот на ДУИ задоволен што еврокомесарот го потенцирал значењето на Охридскиот рамковен договор се врати на долгото говорење
Задоволен што еврокомесарот за проширување Штефан Филе го потенцирал значењето на Охридскиот рамковен договор, пратеникот на ДУИ Талат Џафери го прекина молкот на комисиската расправа за законот за бранители и се врати на долгото говорење.
„Филе јасно укажа дека Европската унија има направено документ за Охридскиот договор, целосна анализа за тоа каде тој се имплементира и поради тоа добро е да се потсетиме како тој настана и кои беа причините за неговото донесување, кое беше, под гаранција на меѓународните партнери и по долги преговори. Резултат на тој дого вор е веќе донесениот Закон за бранители во 2002 година, што е доказ дека не постои потреба да се донесе овој нов Закон за бранители. ДУИ повторува дека ова чувствително прашање треба да се реши, но не на селектривен начин како што тоа се прави сега. Филе, можеби не на директен начин, но на индиректен начин укажа на тоа дека институциите на Република Македонија, ова прашање треба да го разрешат многу внимателно, а начинот на кој тоа сега го прават не придонесува за оние за кои ова решение е наменето“, рече Џафери.
За Џафери сето ова е доказ дека законот за бранители, предложен од пратеничката група на ВМРО-ДПМНЕ, не треба да се донесе. Џафери од Уставот и законот за Собрание, се префрли на цитирање на документи како е донесен и која е важноста на рамковниот договор .
Најави дека ќе следуваат и други изненадувања во неговиот маратонски настап пред Комисијата за труд и социјална политика. Со новата тактика Џафери сака да го блокира изгласувањето на законот за бранители.
|
